雅虎香港新聞 【電影LOL】又有明星得罪內地網民 今次係F9 John Cena 「趙喜娜」講中文致歉
今時今日做明星真係少啲政治觸覺都搞唔掂。今年唯一票房大賣嘅《F9狂野時速》近日捲入政治風波，話說飾演Jacob嘅John Cena好俾力幫電影做宣傳，接受大量海外媒體訪問，其中一個訪問講咗「台灣係第一個可以觀看《F9》嘅國家」，訪問一出即刻焫著內地觀眾，大量內地網民即時出征灌爆Cena嘅社交媒體！
John Cena一向熱愛中國文化，自稱超愛食「老乾媽」辣椒醬，食牛排要點連食西蘭花都要配「老乾媽」，認真誇張！食之外，佢早年未因為《狂野時速》走紅時就已經學中文，一有機會就用中文接受採訪，咁有誠意嘅荷里活影星當然勁受內地觀眾歡迎，不過「台灣係國家」言論一出，幾有heart都無用，被鬧爆「唔識中文就收聲啦」！
Cena知自己得罪內地網民，即刻以全中文拍片放上微博道歉話自己訪問「有一個錯誤，對我的錯誤，我很很抱歉，我必須就現在很很很很很重要，我愛更尊重中國和中國人」。《狂野時速》系列喺內地票房一向勁收，《F9》內地開畫3日勁收8.8億人民幣，暫時佔全球票房85％，雖然《F9》內地票房遠遜《狂8》，不過相信單一市場都夠救市，所以唔敢得罪內地影迷？
荷里活唔止一次為咗遷就內地市場而改劇本、刪改故事，今次道歉有可能出自片廠壓力，亦有可能係John Cena自發，話哂佢為咗內地影迷，講中文之餘仲幫自己改咗個中文名「趙喜娜」，討好功夫荷里活明星中實屬少見。可惜暫時內地網民唔收貨，「國家面前無偶像」，紛紛喺Cena微博留言要佢講「台灣是中國」先肯接受道歉喎！
內地經常因為「辱華」抵制影星及其作品，單係今年已經有《魔物獵人》內MCJin嘅對白，道歉剪片都救唔返，上映3日被即時落畫！接住又到趙婷因為舊訪問「中國不是我的國家」被誤譯，作品連人一同被禁；再近期啲又有網友挖出Tom Hardy 9年前記招用咗「Chinaman」一詞 ，網民聲言要抵制《毒魔：血戰大屠殺》，仲未計有可能被禁嘅《永恆族》及《尚氣與十環幫傳奇》，每年被內地聲討嘅電影相當多！
「喜娜」一句「Sorry」似乎未能平息內地網民，但道歉一出又得失其他地區觀眾，連美國前國務卿龐佩奧就喺Twitter出post話Cena對中國「鞠躬」（Bowing)條腰彎到見唔到個人！今次Cena可謂進退兩難，關公都難救！
更多電影文章
【電影LOL】《神探白朗》續集星級卡士夠拍幾套戲！Edward Norton未埋位已經被網民估係兇手
【電影LOL】今期睇咩戲 《F9狂野時速》玩哂 仲有日本好戲《間諜之妻》
【電影LOL】奧斯卡得獎作《醉美的一課》拍美國版 里安納度做主角 會唔會變《醉爆伴郎團》？
【電影LOL】《老友記》25週年特集下周推出 Lady Gaga BTS客串陣容勁到喊
【電影LOL】外媒勁眼利 中央台一幅圖睇出 Marvel新片《尚氣》《永恆族》可能被內地封殺
【電影LOL】瘦到背脊見骨！彭于晏減磅拍《熱帶往事》演變態殺人犯
按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！
