雅虎香港新聞 【電影LOL】棟篤笑女星遇上賤男 經歷寫成劇本片廠爭住要
一世人流流長總會遇上幾個人渣，問題係事後你點樣翻生？美國諧星兼棟篤笑藝人Iliza Shlesigner將個人經歷寫成劇本《Good On Paper》（台譯：《一婊一人才》），愛情路上嘅苦變成佢事業更上一層樓嘅台階。
Iliza未拍《一》之前齋做talk show，雖然啲show喺Netflix串流平台都有得睇，不過名氣、人氣都好一般。佢自己都知唔係名人覺得無咩人識，結果一次坐飛機隔離坐咗個耶魯名牌大學畢業嘅金融才俊，外貌相當老實，不虞有詐嘅Iliza同佢交換contact開始做吹水朋友！
就算做開talk show見過世面遇到專業騙子都一樣中伏，呢位哥哥社交媒體啲post同佢講嘅有9分吻合，加上自稱有女友，令人放低戒心，就係咁吹水朋友吹下吹下吹出感情，Iliza仲將佢介紹俾自己眾多好友，而騙徒又好大方，成日請哂所有人萬歲，個個都以為佢係吸金能力驚人嘅基金經理！
當時女方仲未完全一心一意仲會date下其他仔，為咗馬實Iilza佢竟然出動「我阿媽生cancer」呢張慘親牌，仲帶埋你見家長，結果落入圈套！咩時侯開始露馬腳？當佢為Iliza搞生日party但又埋唔到單時開始出事，加上薑都係老嘅辣，Iilza媽憑直覺懷疑條仔too good to be true，所以打去耶魯大學查入學紀錄，結果查無此人！
加上去到男人自稱嘅屋企，現實同口述不相乎，Iilza決定同埋佢好朋友起佢底，越查就發現「男友」無句真，連佢啲朋友都係假嘅！Iilza決定攤牌，點知賤男厚顏無齒直認不諱自己係騙子，仲狡辯話當初無諗過Iilza會係真愛喎！
中女lilza當機立斷即時斬纜，本來打算用時間丟淡件事，點知賤男仲夠薑寫長篇大論email批評佢ig張相太少布！焫焫焫焫焫焫到著哂嘅Iliza因此動筆將經歷加入大量喜劇元素寫成劇本Good on Paper！
個故事極多片廠有興趣，最後情歸Netflix，仲搵到美國喜劇泰斗Margaret Cho飾演其母親、好友二合一嘅角色Margot，而賤男則由電視劇演員Ryan Hansen飾演！
電影自出街後引起廣泛討論，Iliza日日都有大堆fans 私訊同佢討論愛情經歷，佢終於衝出名堂仲如願可以轉型做女演員！所以遇到人渣唔緊要，記得經一事長一智！
更多電影文章
【電影LOL】今期睇咩戲 《黑寡婦》上畫新片讓路 得返建黨電影《1921》對撼
【電影LOL】敲定名模王丹妮演《梅艷芳》 造型曝光似唔似梅姐？
【電影LOL】《赤BIG靈靈狗》10呎咁高卡通紅狗狗拍電影版 又因咩事有負評？
