【電影LOL】瘦到背脊見骨！彭于晏減磅拍《熱帶往事》演變態殺人犯

演員為角色改變身型時有聽聞，張建聲最近為新戲《神經大俠》增肥，2個月內增肥至220磅，搞到腸胃差哂，非常大犧牲。

荷里活影星麥克華堡一向以大隻佬型象示人，日日晨早起身操肌，近日佢都因為接拍新戲Father Stu，飾演由拳撃手轉做神父嘅角色增肥，短短3個星期重咗50磅，變成中年肚腩大叔。佢喺自己嘅社交網站出文post頹樣，肌肉難操但走樣就話咁易，拍完戲又要狂操戒口，練返個body，難怪個樣咁頹！

另一男神彭于晏亦為電影角色改變自己外型，不過佢唔係增肥而係減磅，飾演瘦到見骨冷血殺人犯！由《瘋狂的石頭》導演寧浩監制、溫仕培執導新戲《熱帶往事》，故事講述90年代末一個全城停電嘅晚上，一宗命案改寫3個人嘅命運。

彭于晏於《熱》首次同張艾嘉合作，彭飾演嘅王學明當晚遇上意外，張艾嘉飾演嘅梁媽因為老公無故失踪而向陳警官（王硯輝 飾）求助，渾然不知自己己經成為兇徒下一個目標。隨住陳警官追查失踪案線索，案情發展越來越撲索迷離，3人糾纏20年…

導演溫仕培表示《熱》係一個道德倫理極複雜嘅灰色地帶，3人各懷秘密，既有善亦有惡嘅一面。電影早前公開預告片，片段可見彭于晏有別以往健美、陽光形象，反而瘦到面都凹埋，眼神時而迷濛時而兇狠，成條預告得彭一句「我要給你講個故事，故事從一個人的死亡開始」對白，配上暗綠、深紅色調，集齊懸疑驚慄元素。當然最嚇人都係見到彭于晏瘦到脊椎現形！

不過各位彭太太唔駛擔心，彭于晏已經回復fit爆6嚿腹肌嘅身型！《熱帶往事》其實早於2018年已經拍好，當時更獲得第68屆柏林國際影展VFF Talent Highlight Award大獎，為該單元成立15年來首次獲獎嘅華語片，只不過等咗足足3年先終於上映有期，有望成為今年內地暑假檔黑馬，希望彭于晏一番努力唔會白費！

更多電影文章

【電影LOL】被指白人主導兼恐同 電視台、影星齊齊杯葛金球獎 湯告魯斯退還獎座

【電影LOL】玉女Lily James演90年代波神 還原荷里活明星性愛片流出事件

【電影LOL】Ironman羅拔唐尼倒戈幫DC開新戲《鹿角男孩》 竟然係暗黑版《小鹿班比》？

【電影LOL】今期睇咩戲 《醉美的一課》《波斯密語》《奇蹟的燒肉店》《跟你老婆去旅行》《秘密訪客》《夢魘》

【電影LOL】Emily in Paris 第2季全員巴黎準備開工 女主角情歸何處？

【電影LOL】Marvel 晒冷預告片 預視未來5年MCU有咩大片 《永恆族》片段首度曝光

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！