【電影LOL】華納搞串流平台得罪《天能》大導 Christopher Nolan宣布轉會

新冠疫情對電影業影響深遠，甚至改變生態！因為疫情全球居家，令串流平台需求急升，各個荷里活片廠推出自家平台救市，不過有人歡喜有人愁，Disney＋訂戶加Premier Access大賺，換嚟《黑寡婦》女星Scarlett Johansson入稟告迪士尼毀約；另一間片廠華納未有明確數據証明HBO Max幫到手止蝕，只可以確定因為串流平台得失咗金蛋—Christopher Nolan！

金像導演Christopher Nolan自2002年《白夜追兇》起同華納合作差唔多20年，期間出咗叫好叫座嘅《蝙蝠俠》、《潛行凶間》、《星際啟示錄》、《鄧寇克大行動》等鉅製，Nolan作品套套話題性十足，幾乎人人睇完都有自己一番解讀。當年好多觀眾睇完坊間解讀先入場睇《潛》，仲因為細節好多而要一睇再睇，造就可觀票房。

可以拍非超級英雄、暢銷小說改編嘅原創故事，而套套票房、評價成績理想嘅導演寥寥可數，Nolan係其中一個！可惜早前華納因為《天能Tenet》上映策略，激嬲Nolan令佢決定轉投其他片廠懷抱！

事緣疫情期間戲院關門生意重創，Nolan為咗幫助佢熱愛嘅電影院，堅持暑假尾上《天能Tenet》救市。華納原本想延期最後都讓步，不過失策在於無通知零協商嘅情況下，將《天》放喺HBOMax同步上映，結果激嬲Nolan，指責華納糟蹋咗電影，仲話HBOMax係史上最爛串流平台！

外媒Deadline日前証實Nolan以二戰背景，根據科學家J. Robert Oppenheimer研發原子彈為題材嘅新作，將由環球影業投資及發行，正式同華納分手！新戲預算高達1億美金，據報早前Nolan同多間片廠洽談，可惜咁貴未必間間片廠俾得出，佢最唔buy同資金充足嘅串流平台Netflix都有加入戰陣，希望用誠意打動Christopher Nolan，不過導演堅持電影要喺院線上映，唔考慮同串流平台合作！

電影暫定下年開始拍攝，預期會有多位一線巨星演出，Deadline爆料指《蝙蝠俠》、《潛行凶間》男星Cillian Murphy好大機會再次同Nolan合作！

華納無哂《哈利波特》系列，重啟DC系列又唔係套套得，依家無埋Christopher Nolan呢隻金蛋，唔通打算轉型靠串流平台谷劇集維生？

更多電影文章

【電影LOL】今期睇咩戲 禁室殺戮2／咒術屍戰／911算命律師／看不見的愛／聖慾

【電影LOL】泰、韓恐怖片大師合作《凶靈祭》得人驚到要搞開燈放映俾細膽觀眾

【電影LOL】《末日先鋒：戰甲飛車》戰車拍賣 $1起標價高未必得

【電影LOL】《22世紀殺人網絡 復活次元》玩紅藍藥丸橋段 chok出18萬款電影片段！

【電影LOL】彗星撞地球世界末日！巨星雲集《千萬別抬頭》梅麗史翠普演總統影射邊個？

【電影LOL】宮崎駿又退休唔成做企畫 吉卜力首套全電腦動畫《安雅與魔女》

【電影LOL】導演爆《水行俠2》變恐怖片 Jason Momoa造型由巨型栗米變暗綠龍王

【電影LOL】Daniel Craig最後一戰！《007 : 生死有時》上畫前夕 片商推紀錄片造勢

按此下載 Yahoo APP 9月免費送一萬個蛋撻王Q嘜蛋撻，仲有貓山王榴蓮冰皮月餅/鳳梨奶黃月餅同你賀中秋，立即下載！