4大一人火鍋推介！台灣過江龍放題、$65日式一人牛肉壽喜燒鍋

冬天梗係要打邊爐喇！但有時口痕但又組唔到團，自己一個去打邊爐都係唔錯嘅選擇。今期介紹幾間有得一人一鍋嘅餐廳畀大家，有日本同台灣嘅過江龍，價錢又抵食，最緊要係唔怕尷尬呀～

健康台式火鍋 麻豆子健康湯鍋

喺台北桃園有十幾間分店嘅台式一人一鍋，香港上水都有分店，仲供應90分鐘放題，啱晒大胃王！呢度嘅湯底用大豬骨及蔬菜熬製多個小時而成，再用呢個豬骨湯演化成唔同口味嘅鍋，如麻辣、南瓜起司、香濃叻沙、沙茶大腸、藥膳及蕃茄等。另外餐廳八成食材都由台灣直送，好多台式地道食材如鴨血、芋泥貢丸、手工黑輪、豆皮、老油條同王子麵等，仲有台式小食同多款配料呀～

招牌臭臭鍋 8鍋臭臭鍋

一間好有人氣嘅台式一人火鍋專門店，最受歡迎係招牌臭臭鍋，果然名不虛傳，一上枱已經聞到輕輕臭味，然後愈滾愈臭，臭豆腐fans一定鍾意！有臭豆腐、白豚肉、台灣貢丸、米血糕、大腸、鴨血、沙白、娃娃菜、金菇、炸枝竹及鳴門卷等，可自由跟配粉絲或飯，好足料。芝士牛奶鍋都好有人氣，好重奶香同芝士香但又唔會膩，食落好似cream pasta，另外仲有黑麻油雞鍋、香蒜牛肉鍋同沙茶牛肉鍋都唔錯㗎。

日式一人火鍋 SUKIYAすき家

日本過江龍牛肉飯專門店嘅日式一人火鍋，牛肉壽喜燒鍋湯底香甜惹味，本身已包牛肉、烏冬、蟹柳、金菇、生菜、白菜及一碗白飯，食完都幾飽肚，如果唔夠可另外追加牛肉等配料～最近仲有新推出香辣牛肉壽喜燒鍋，甜甜地之餘仲帶少少辣味，湯底更有層次，而且價錢都只係$65，真係超抵食呀。

一人蒸氣火鍋 船渦

呢間唔係普通烚下烚下，而係一人一蒸氣火鍋， 每個座位同座位之間都可以落窗簾隔開，自己一個食都唔怕尷尬。餐廳主打海鮮蒸氣火鍋，所有海鮮都係由老闆每日於香港仔魚市場親手揀，然後直送到餐廳，保證新鮮！套餐由平到貴都有得揀，中價位八府巡按套餐已經好夠食，包三款刺身、兩款炸物、海鮮如白蜆、蝦、半隻龍蝦、鮮魚片、鮑魚、元貝、蟶子皇或蟹等、肉類兩款、三寶元、蔬菜拼盤及甜品，每一款海鮮都鮮味滿滿！

文: Yanica