上內地真人show剖白 打牌導致離婚 艾威︰前妻選擇麻雀不選我

曾被稱為TVB綠葉王嘅艾威，2020年同結婚18年嘅陳美玲(Lisa)離婚。當年Lisa患有子宮肌瘤，艾威曾經花盡積蓄做醫藥費，結果都係各行各路。離婚後艾威曾經輕描淡寫分開係因為大家性格不合，而且艾威同Lisa分開後仍然係好朋友，艾威做訪問都會去Lisa鋪頭取景。

11月上架嘅內地婚姻真人show《再見愛人2》，搵艾威同陳美玲現身剖白離婚原因，節目中艾威卻講出另一版本，原來陳美玲熱愛打麻雀，有時甚至打通宵。艾威曾經同Lisa協定可以打牌打到夜晚11點，但係結果Lisa打通宵。艾威又試過表達，對方再打牌就離婚，點知3個月後Lisa若無其事咁去咗打牌。因為咁，艾威同Lisa開始無偈傾，艾威更加感到絕望，甚至問「點解佢揀麻雀唔揀我」，於是決定離婚。

節目中另一參加藝人認為Lisa打通宵牌，可能係因為身體問題，令佢想做啲事覺得自己同正常人冇分別。原來肝腎都有事嘅Lisa，2位哥哥都因為癌症逝世，但Lisa卻對於日益生長嘅子宮肌瘤諱疾忌醫。喺節目尾聲，製作組俾一張卡問各人仲想唔想離婚，Lisa揀唔離，但艾威係揀離婚。

《再見愛人2》會有18日時間俾3對離婚夫妻相處，等佢地再次考慮要唔要分開，到底最後艾威同Lisa會唔會復合？

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！