坐榻榻米嘆定食+富士山麻糬蛋糕！上環新開日式昭和風喫茶店

上環呢間新Cafe一開就喺各大社交平台洗版，皆因小店走日式昭和風格，裝修好有復古氣息，最受歡迎嘅係有日光嘅榻榻米位置，去到好似置身日本咁。除咗咖啡、日式定食，亦有富士山造型嘅甜品同特飲，打卡點多到數唔完！

日式昭和風裝修+榻榻米座位

「稍息」由幾位同樣鐘情日本昭和風格嘅合夥人開設，知道大家好耐無去旅行，所以希望打造一間畀大家有去咗日本Feel咁嘅餐廳，同時更係一個忙裡偷閒、休息打氣嘅空間。據悉餐廳申請緊酒牌，成功嘅話年底有望夜晚供應埋日本清酒同生啤！

全日供應日式定食

全日定食主菜有五款選擇，包括最受歡迎嘅日式野菌豚肉卷、色彩繽紛嘅五色素菜等。拍攝呢款就係採用挪威三文魚，先慢煮至半熟，再用牛油煎香，最後以火槍輕炙魚皮嘅香煎三文魚扒，令魚皮香脆，魚肉軟嫩多汁。定食附茶碗蒸、漬物、湯、日本越光米飯。茶碗蒸裡面有冬菇同蟹柳絲，再加上三文魚籽提鮮。湯就用咗日本蜆，味道鮮甜。

打卡必點富士山造型蛋糕

藍色嘅蝶豆花戚風蛋糕加上海鹽芝士奶蓋，猶如迷你日本富士山！戚風蛋糕係少甜配方，口感輕盈鬆軟，亮點在於裡面有軟糯嘅麻糬，增加口感層次。味道就主要嚟自海鹽芝士奶蓋，鹹鹹甜甜又有奶香，再配搭士多啤梨，整體甜而不膩。

布丁亦係喫茶店常見嘅甜品，呢度嘅稍息布丁以焦糖嘅苦甜味道為主，口感滑溜軟Q。配搭Mövenpick雲呢拿雪糕同糖漬車厘子，甜度較高。勝在分量適中，一個人要食完一份都無難度。

人氣富士山特飲

飲品亦見富士山嘅蹤影！白色嘅係Mövenpick雲呢拿雪糕，藍色就係加入藍橙糖漿嘅梳打。放心餐廳知道大家唔想飲太甜膩嘅飲品，所以糖漿落得唔多，就算同雪糕一齊飲都好Refreshing。

如果真係非常怕甜嘅話，其實餐廳亦有咖啡同茶選擇，三款茶飲都選自日本茶莊，呢款淺焙綠茶係當中最清爽嘅一款，口感醇厚帶回甘，而且無任何澀味。

稍息

地址：上環永樂街77號OVEST地下1號舖

文：Cathy.H

相：Michael