下流上車族︳19年港姐黃嘉雯偷吻林敏驄人氣彈起 家姐被控虐貓罪成不服上訴

《下流上車族》步入結局周，車家一家之主車志明（林敏驄飾）同老婆莫雯慧（江美儀飾）陷入婚變邊緣，本來雯慧願意改變挽救婚姻，點知車志明同同是天涯淪落人嘅日語學校校長Peggy（黃嘉雯飾）一時心動下咀嘴，仲俾細女蔓蔓（羅毓儀飾）撞見，令車家瀕臨分裂邊緣！

大纜都扯唔埋嘅車志明同Peggy竟然有嘢，唔多唔少令人諗到係咪林敏驄自肥之舉，的確由黃嘉雯(Carmaney)演Peggy一角係由林敏驄提出。本來Carmaney拍劇機會唔多，咁都被相中，真係要佩服林敏驄好眼光。

下個月就29歲嘅黃嘉雯，2018年獲澳門選美連盟甄選為國際小姐香港代表，去到日本東京參加2018年度國際小姐競選。之後Carmaney因為受2016年港姐馮盈盈嘅鼓勵，再下一城參加2019年度港姐，並以熱門姿態奪冠。

TVB近年鬧女藝人荒，但Carmaney主要被派去做主持，到舊年先開始喺劇集出現，演過《把關者們》同《青春不要臉》等，《下流上車族》一咀成名之後，應該會有更多機會。

黃嘉雯參選港姐前本來有位外籍男友Metej，更被傳媒稱為「瑞士碧咸」。Metej更為Carmaney搬到香港，女友選港姐時更打點飲食。但今年Carmaney受訪時承認，已經同Metej分開一排。

而Carmaney家姐黃綺婷，就因為喺去年初將貓貓放入洗衣機轉動，仲拍片放上網，因而被控虐待動物。法官判黃綺婷罪成，需進行80小時社會令，後來黃綺婷不服裁決提出上訴。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！