「下流姊妹花」恨拍續集 羅毓儀鎖定張彥博組童顏CP

郭柏妍與羅毓儀憑無綫劇《下流上車族》人氣急升，昨日她們綵排台慶時揚言恨拍續集，羅毓儀笑言已揀定續集的男友人選，郭柏妍非常支持「妹妹」拍拖。

郭柏妍（Rosita）與羅毓儀（Yuki）昨日為台慶綵排，將在台慶表演Rap及跳舞。提到《下流上車族》前晚大結局，她們表示忙拍劇而未能觀看，感到有點遺憾，Rosita指劇集播出前擔心被觀眾批評演技，連續幾星期失眠，幸好播出後反應佳，由擔心變開心。

對於林敏驄笑言不想阻住大家發展，應該見好就收，問她們想不想拍續集？Rosita說：「想，我哋全部人都等緊驄哥消息。」Yuki揚言一定要原有班底拍續集，問到想不想在續集中有感情線？她笑言：「劇情有需要都想，家姐都結咗婚，我喺劇入面都大個女，可以拍拖。（想搵邊個飾演男友？）頭先綵排黃建東話覺得我同張彥博都係童顏，我哋可以組成童顏CP。」

江嘉敏屙到腳軟

同場的張振朗與江嘉敏有份排練，前日因病缺席無綫節目巡禮的江嘉敏全程戴口罩，她透露剛看了醫生：「醫生話我係腸胃炎，屙咗兩日水，希望台慶可以瘦到，依家有啲腳軟，不過仲有一星期先係台慶，所以冇問題。」提到她有份主演的劇集《新四十二章》兩度被抽起，未能成為台慶劇，她表示：「公司咁嘅安排一定有原因。（少咗爭獎機會？）我又冇諗呢啲。」曾經是「地獄黑仔王」的張振朗以過來人身份安慰江嘉敏：「唔緊要，我啲劇都抽起過好多次，最後一定會播！」