中年好聲音︱譚校長分享錄《忘不了你》變《忘七了你》趣事 林敏驄出PO反擊

TVB歌唱真人騷《中年好聲音》好評如潮，噚晚（26日）最新一集播出《譚校長金曲！爭入12強！》，搵嚟譚詠麟擔任嘉賓評判，15位參賽者輪流唱出校長金曲爭入12強。期間「鮑大人」鮑聖光選擇唱出《忘不了你》，譚校長除咗俾意見之外，同時亦分享錄該歌曲嘅趣事，不過似乎引嚟作詞人林敏驄不滿，喺Facebook出PO反擊。

「鮑大人」鮑聖光喺最新一集唱出《忘不了你》，不過評判們嘅反應麻麻，只有70分。「鮑大人」表示自己經常聽校長嘅歌曲都會不自不覺咁流淚，譚校長就大爆TVB高層曾志偉每一次聽《一生中最愛》都會喊，而佢亦唔知道原因。之後譚校長再分享錄《忘不了你》時嘅趣事，大爆呢首歌好難唱，當年為咗要唱出「心悒味」，佢就空肚飲咗4分3支白蘭地，從而進入狀態，咁樣先有呢個效果。

然後，譚校長就講到歌詞部分，佢話「阿驄（林敏驄）寫俾我嗰陣時，歌詞係手寫版，最後一句唔知係咪有眼淚滴咗落去，字化開咗，忘不了你個不字，變咗中文字嘅七字…」，之後引起全場爆笑。呢個玩笑雖然帶動全場氣氛，不過就好似引起作詞人林敏驄嘅不滿，佢就喺Facebook上載二人合照嘅黑白舊相，並留言話：「#丟里乃，e條 #含後腸 #多謝都冇句 #後悔寫左咁L多俾里條...#7up當秘笈，#吔紙啦...#有種以後米L唱 (#禾都係講笑乍) #丟里乃」。唔少網民都紛紛留言叫佢息怒，「驄哥息怒」及「車總！請息怒校長都係攪吓氣氛」等等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！