中年好聲音︳屯門娜娜被肥媽狠批0分出局 第一集就有黑馬出場

TVB新選秀節目《中年好聲音》尋晚首播，節目未出街已經有唔少迴響，報名人數都已經有3千人，加上打入100強嘅有出過唱片嘅歌手、音樂人甚至藝人家人，綽頭十足。尋晚展開嘅第一回合，形式係參加者先背向5位評審演唱，評審隨時可以按燈「留人」，有4盞燈就可以晉級50強。值得一提係，5位評審當中，3位（肥媽、周國豐、張佳添）都曾經係亞視2009年舉辦嘅《亞洲星光大道》評判團成員。

第一集眾多出場嘅參加者，包括曾在屯門公園賣唱而成名嘅「娜娜」（董幸兒）。早前「娜娜」入圍已經惹人談論，TVB仲邀請娜娜fans「Happy伯」去電視城撐場。演唱經驗豐富嘅娜娜以《風的季節》參賽，不過頭幾句已經忘詞甩咀，加上廣東話唔正，最終一盞燈都冇慘俾淘汰，應該令Happy伯unhappy了。評審之一肥媽睇娜娜演唱睇到皺晒眉頭，更直言娜娜未開聲已經顧住擺甫士，難怪會甩。

尋晚出場嘅不乏「食過夜粥」之人，包括曾經簽約有線嘅周吉佩、《男親女愛》主題曲《藍天》作曲人羅金榮、參加過內地央視春晚嘅龍婷，佢地都成功出線。

之前TVB曾經推出《中年好聲音 向夢想再出發》介紹參加者，但有部份素人未有出場，尋晚現身嘅顏志恆係酒店廚師，佢以《一首歌一首故事》參賽，被評審之一伍仲衡盛讚顏志恆難得冇原唱者譚詠麟嘅味道，張佳添更直指顏志恆係黑馬！反而61歲嘅鮑聖光唱蔡楓華嘅《倩影》時，一開聲就因為似蔡楓華而得到林志美俾燈，最後仲順利入圍。另一位素人呂耀強以充滿煙味嘅歌聲唱《誰明浪子心》同樣有驚喜，但只有3盞燈暫未能直接出線。

而李玟家姐李思林、黑妹李麗霞愛女蔡穎秋都首集現身，李思林有3盞燈要等評審揀選，蔡穎秋就有5盞燈成功晉身50強。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！