中招差啲要入院 張敬軒個唱加場玩新花臣

軒仔康復後,重新投入工作。
軒仔康復後,重新投入工作。

歌手張敬軒早前因染疫而煞停演唱會,餘下場次將於6月補辦,昨日是他康復後首度公開露面,預告屆時演出將有新元素及新歌衫,亦計劃加場滿足歌迷。他又指抱恙時血含氧量低一度想入院,復原後又有腦霧及持續咳嗽。

上月舉行演唱會期間確診的張敬軒,經過個多星期休養後,近日再次投入工作,昨日精神奕奕見傳媒,透露現時身體已沒有大礙,只是有腦霧及間中咳嗽,更搞笑說:「其實我出世已經有腦霧,只係媽咪遺傳嘅係純啲,今次惹番嚟嘅就比較濁啲!」

談到染疫詳情,軒仔表示曾高燒至40度,由於血含氧量低更一度想入院,幸翌日起床後回復正常:「So Far我冇喉嚨痛,只係有鼻水同埋發燒,到好番先咳,到第7、8日已變番一線。」並指未有考究如何受感染。

追星苦等李玟電話

個唱延至6月補場,問到屆時是否不再接受粉絲送禮物?他說:「都會,因為疫情搞到個人好疲倦,所以我會好珍惜,好似今次開騷,唔知下次幾時再開,見到粉絲送禮物同公仔,我做唔出就咁樣擺喺台上面,但媽咪就打電話嚟鬧我。自己都做過粉絲,追星追過李玟同Whitney Houston,有喺機場等過,仲寫過信畀李玟,等咗10幾個鐘希望佢打畀我,不過佢咁多粉絲,封信可能到依家都未開,所以到我依家收到粉絲嘅信,有回郵信封我會寄番畀佢,如果有寫低電話,我都會搵時間打畀佢。」

他預告個唱將有新元素及新歌衫,亦計劃加場:「如果加場會加喺前面,因為有粉絲話要留番個真尾場。(點解要延到咁後?)諮詢過啲醫生,同埋要配合唔同單位,因為通關之後唔知個疫情會點樣,覺得呢個期比較適合。喺度都想同受影響嘅觀眾講對唔住,我會再睇緊自己多啲,希望粉絲見諒!」

另外,為配合軒仔主演的賀歲電影《超神經械劫案下》即將上映,「譚仔」及「三哥」米線將攜手合作推出特別套餐,軒仔早前更特意穿上戲服試食,引得一眾在場的侍應姐姐大讚他「令仔」,氹得他開心不已!

軒仔獲侍應姐姐大讚「令仔」。
軒仔獲侍應姐姐大讚「令仔」。