《二月廿九》續集《940920》繼續穿梭時空 蔡思韵加盟計劃明年4月開拍

ViuTV開台至今接近5年，推出過唔少好評如潮嘅劇集，例如《詭探》、《瑪嘉烈與大衛系列綠豆》、《二月廿九》、《教束》及《歎息橋》等等，劇集喺網上嘅討論度都係爆晒燈，深得唔少觀眾喜愛。ViuTV喺早兩日就播出節目巡禮《ViuTV 2021》，喺短短30分鐘嘅節目巡禮中，ViuTV就播放咗《男排女將》、《太平紋身店》、《無限斜棟有限公司》、《超感應學園》及《940920》。另外，仲有多個真人騷及綜藝節目等等，不過最令人期待嘅一定係《二月廿九》續集《940920》！

由劉俊謙、徐天佑及吳海昕主演嘅《二月廿九》播出時獲得唔少網民追捧，更被封為神劇，近日仲入圍新加坡亞洲學院創意獎「最佳劇集」。喺節目巡禮中，ViuTV公開《二月廿九》將會喺2021年開拍續集《940920》，除咗繼續有劉俊謙及吳海昕之外，劉俊謙女友蔡思韵都會加盟。蔡思韵同樣擁有穿越能力，佢創立「神聖幾何學會」並邀請家聰成為第一個會員。

導演兼監製羅嘉駿（Steve )喺接受傳媒訪問時，佢就話暫定10集嘅《940920》計劃喺4月開拍，將會喺香港同台灣取景，預計12月交貨。Steve仲話故事大綱已經大致完成，今次會由家聰做主體，穿梭喺兩個時空之中。至於飾演暖男Ryan嘅徐天佑，Steve就話佢唔係主線，不過好希望佢可以客串。

「940920」其實係咩嚟？相信有睇《二月廿九》觀眾都會記得，呢個除咗係家聰媽媽嘅死忌之外，亦係Yeesa第一次穿越去到未來嘅北海道時，余家聰俾佢嘅密碼。