雅虎香港新聞 人氣東京抹茶店首家堂食分店 拉絲棉花糖/抹茶麻糬Croffle + 茶道體驗
抹茶幾時都會有班捧場客，呢間嚟自東京表參道嘅抹茶店，今年年頭先喺銅鑼灣開設第一間香港分店，話咁快而家又喺荃灣再開新店，而且仲有埋堂食座位，可以慢慢坐低嘆茶嘆輕食，兼且首設茶道工作坊，可以跟茶師學下嘢呢。
THE MATCHA TOKYO 標榜選用100%有機抹茶製作，味道甘甜濃郁。今次推出咗幾款新輕食，有部分更係荃灣店限定呢。3款croffle新口味包括抹茶麻糬、棉花糖同焦糖香蕉味，其中就咁睇平平無奇嘅抹茶麻糬Croffle，切開見到入面原來一片「綠海」，啖啖都係軟糯兼滲有茶香嘅抹茶麻糬。
焦糖香蕉加咗粒粒核桃碎，口感層次多咗，加埋本身croffle夠酥脆，整體唔錯。至於棉花糖嗰隻，係想像得到嘅甜。
另一款新品係Egg In The Cloud，個樣幾靚，隻蛋整到好似成朵白雲咁，蛋白軟腍腍，富空氣感，帶有陣陣甜香。可選配三文魚或雞肉，搭埋牛油果、沙律同原味croffle，好似All day breakfast一樣咁豐富。
嚟到梗係要飲返杯抹茶，選用京都宇治同鹿兒島自設茶園嘅100%有機抹茶製作，抹茶 Latte x 沖繩黑糖雪糕茶香濃郁，甜度高而回甘少。而今次更推出多款焙茶新品，全部都係選用有機茶葉，經深度烘焙製成，性質較為溫和，加入牛奶就變成焙茶 Latte，仲可以加多球北海道牛乳雪糕喺面，味道醇厚。咖啡豆都多咗兩款，分別係阿拉比卡有機咖啡豆同危地馬拉咖啡豆，兩者各有唔同風味，前者帶有榛子、野莓、蜂蜜同檸檬味；而後者則有腰果、柑橘同朱古力嘅味道，大家可以按心水點選使用唔同嘅咖啡豆。
荃灣新店更首設30分鐘茶道工作坊，逢星期五、六、日嘅朝早，由茶師面授日本茶道，完成工作坊後仲有證書添。想試玩嘅朋友仔要預約留位呢。
地址: 荃灣白田壩街45號南豐紗廠地下G01號舖
文：Kar
相、片：Wilfred
