今際之國的闖關者2丨劇迷力數3大負評批劇情唔合常理：改名做說教之國

日劇《今際之國的闖關者》改編自日本漫畫家麻生羽呂同名漫畫作品，劇中大玩一場又一場嘅生存遊戲。第一季《今際之國的闖關者》廣受好評，第二季亦於啱啱過去嘅12月22日於Netflix上架。主角有栖（山崎賢人飾）、宇佐木（土屋太鳳飾）及全新成員塀谷朱音（《AV帝王2》恒松𧙗里飾）等人迎來比上季更血腥、更燒腦嘅死亡遊戲：「紅心J」、「梅花K」、「方塊K」等等。《今際之國的闖關者》上季好評滿滿，加上今季有山下智久全裸加持，仲被外國影評人大讚超越《魷魚遊戲》，犧牲自己成全他人嘅自我救贖令人感動。不過卻被網民直言大失望，仲指魷魚遊戲成功就係無說教，個個都為生存，但《今際之國的闖關者》劇情完全唔掂。即睇劇迷嘅3大負評！

《今際之國的闖關者2》負評1：劇情講得太多道理
劇集主角一路闖關，一路都被考驗著團隊間是否存在信念，人們會否於恐慌中刻服對別人嘅信任團結闖關，令人反思唔少對人性嘅思考。不過，有劇迷於討論區以「今際之國不如改名做說教之國」為題出PO，指今季劇集說教味太濃，反而忽略咗殘酷遊戲呢部份，係大失敗既原因：「集集都講半個鐘經」、「道理好廢，唔見到令主角有成長同矛盾，完全無啟發性」、「次次講道理就想飛，拿拿聲比我睇多幾個game好過」、「點估到我大個左之後，聽得最多大道理，竟然係睇netflix果陣」、「都已經2023年，仲玩緊企定定說教講大道理」等等。

《今際之國的闖關者2》負評2：遊戲太悶、劇情唔合常理
劇迷認為今季比起上季嘅闖關遊戲完全唔刺激，同埋劇情唔合常理，過份主角光環咁話，例如一開始嘅大逃殺，主角等竟然無被射中，而去到對抗黑桃k時中極槍又死唔去；另外，其中一集山下智久明明領先緊都要走去散步及同人握手，結果輸埋都令劇迷搲爆頭。

《今際之國的闖關者2》負評3：節奏極慢
《今際之國的闖關者2》大玩生存遊戲，不過劇迷就覺得節奏過慢，完全唔符合主題，仲留言：「玩一隻生死攸關既死亡遊戲，玩玩下可以有時間靜落黎講人生大道理，依一點就係我棄睇日本作品既原因，節奏控制垃圾到不得了」。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！