保錡@ERROR大愛陶大宇版《倒轉地球》 網民為陶大宇開專頁：演戲耽誤唱歌事業

ERROR成員吳保錡喺IG指最近好中意聽歌曲《倒轉地球》：「最近大愛一首歌，不得不重唱一次，無論表情和語氣，都表現得10分到位，所以決定表演給大家看，重複睇了100次的《倒轉地球》。」保錡分別拍成兩段唱歌短片，一條係獨唱版，另一條就係將陶大宇唱歌畫面拼合而成嘅「合唱版」，獲網民大讚神似，更引嚟陳家樂、張紋嘉等藝人留言，就連小肥都忍唔住爆粗：「X您真係拍出嚟！」。

保錡所模仿嘅正正係近期網絡熱話：陶大宇；近年不時出席內地商演獻唱嘅陶大宇就成日以劉德華《倒轉地球》及《愛你一萬年》作表演歌曲，次數頻密得簡直做咗佢嘅首本名曲。雖然唱到走晒音又甩晒拍，被網民指「耳仔受威脅」，但陶大宇處變不驚，用上堅定而溫柔嘅眼神繼續唱落去嘅行爲就獲網民留意，仲惡搞話應該將叱咤「我最喜愛的男歌手」頒畀陶大宇。

新城電台DJ兼YouTube頻道「HEBEFACE」經營者黃亦彤（Hebe）就喺FB專頁自稱係陶大宇歌唱事業關注組會長，仲分析陶大宇近日演繹《倒轉地球》嘅方式，指陶大宇仍貫徹水潑式演唱動作、由10月唱到而家都係尾音飄浮，完全好似歌詞所講嘅「就是未怕醜」、歌曲結尾改以三段式層遞演繹並拉高音收尾，唔少網民都留言惡搞話支持陶大宇：「好聽咗喎，証明功多藝熟」、「樂壇希望」、「比演戲耽誤咗唱歌事業嘅陶大宇」等等，仲有網民仿效MIRROR粉絲老公開設「我老婆鍾意咗陶大宇導致婚姻關係破裂關注組」FB專頁分享陶大宇表演片段，相當抵死，而截至今日（30日）中午12點呢個專頁已經有超過5,900人加入。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！