【兔年開飯】新春自助餐指南 早鳥優惠低至75折

新嘅一年，要以豐盛又好意頭嘅賀年美食開啟！一班親朋戚友相聚，食自助餐就最啱啦。今次幫大家介紹其中五間酒店嘅新春自助餐，都有供應唔同嘅應節佳餚，部分更有折扣優惠，記得早啲訂位呀。

新春尚味自助晚餐 萬麗咖啡室

灣仔呢間酒店餐廳推出新春尚味自助餐，最搶眼嘅當然係色彩繽紛，寓意越撈越旺嘅撈起！裡面有鮑魚、帶子、三文魚等。另外亦有一系列鮑魚美食，包括和風磯煮鮑魚、紅燒鮑魚海蔘煲、鮑魚雞粥等，「鮑」羅萬有。

供應日期：2023年1月20至25日
供應時間：18:30-21:30
價錢：成人$758/位、小童$438/位
*於網上商店訂購自助餐可享最高75折優惠

鮮味薈萃海鮮饗宴自助晚餐 The Promenade餐廳

位於黃埔嘅海景自助餐廳就以主打環球海鮮美饌鮮味薈萃海鮮饗宴自助餐同大家一齊恭賀新年，精選美食包括芝士焗龍蝦、汁煮鮑魚、紅燒花膠扣鴨掌等。新春期間（1月22至25日）更特別為每枱送上吉祥撈起魚生一客，一家人可以齊齊撈起！

供應日期：即日起至2023年2月28日
供應時間：18:30-22:00
價錢：星期一至四成人$708/位、長者$608/位、小童$518/位，星期五至日、公眾假期及其前夕成人$748/位、長者$648/位、小童$558/位
*於酒店eShop訂購自助餐可享最高8折優惠

新春豐味自助晚餐 The Food Gallery

想食到多款好意頭嘅菜式，可以留意尖沙咀呢間自助餐廳。除咗回本必食嘅凍海鮮、壽司及刺身之外，新春自助餐更有「豐衣足食」招牌鮑羅萬有炒飯、「年年有餘」清蒸比目魚、「老少平安」鯪魚蒸滑豆腐、「步步高升」香煎蘿蔔糕配特色XO醬等吉祥限定菜式。

供應日期：2023年1月21至25日
供應時間：18:00-22:00
價錢：成人$798/位、長者及小童$528/位

優惠券：自助晚餐可享9折優惠

喜迎兔年賀歲自助晚餐 灣景廳

灣仔呢間酒店自助餐廳同樣供應多款應節佳餚，包括「一團和氣」籠仔蒸瑤柱鮑魚伴櫻花蝦荷葉飯、「金玉滿堂」碧綠蛋黃蝦球、「鴻運當頭」炸子雞、「黃金滿屋」燕窩葡撻。年初二更會為每位客人奉上烤西班牙式脆皮乳豬同足料佛跳牆！

供應日期：2023年1月21至25日
供應時間：18:30-21:30
價錢：按此瀏覽價目表

鮑燕盛會海鮮自助晚餐 Park café

尖沙咀呢間自助餐廳以鮑魚同燕窩兩款名貴食材為主題，推出鮑燕盛會海鮮自助晚餐。推介菜式包括燕窩鮑魚雞粒撻、金沙吉列鮑魚海鮮、花膠姬松茸蟲草花燉雞湯、燕窩鮑魚龍蝦粥等。連甜品都有燕窩桃膠燉蛋白同即焗燕窩芝士蛋白撻，女士養顏一流。

供應日期：即日起至2023年5月3日
供應時間：18:30-21:30
價錢：星期一至四成人$568/位、小童$398/位，星期五至日、公眾假期及其前夕成人$598/位、小童$408/位

文：Cathy.H