入廁所回氣 陳山聰劉佩玥 肉搏坐凹梳化

視帝陳山聰與劉佩玥昨日為新劇進行拜神儀式，被監製踢爆拍攝「愛情動作戲」時坐凹梳化！山聰笑言由門口大戰到客廳，全身濕透攰到爆，又預告有更激的肉搏戲！至於郭柏妍與丁子朗回應緋聞時氣氛尷尬，支吾以對。

陳山聰、劉佩玥（Moon）、張振朗、劉穎鏇、丁子朗及郭柏妍等，昨日在將軍澳電視城為新劇《奪命提示》進行拜神儀式。監製爆料指山聰與Moon有不少「愛情動作戲」，前晚激戰時更坐凹梳化！山聰受訪時笑說：「場戲由門口搞到梳化，又擲嚟擲去，佢仲坐上我大髀，拍到好攰！出晒汗成身濕晒，Moon直情要去廁所冷靜一下回氣，之後仲有幾場肉搏戲仲激！」問到坐爛梳化，是否需要減磅？Moon說：「新年同劉穎鏇約定食少啲嘢，其實唔係磅數問題，係我身形骨架嘅問題。」

緋聞情侶郭柏妍與丁子朗傳戲假情真，他們受訪時繼續否認緋聞，但表現得相當尷尬，支吾以對，子朗說：「通常劇集出街先會有緋聞，估唔到依家拍緊就有，有啲愕然。」提到新劇要拍足半年，朝夕相對，可有機會發展？郭柏妍說：「都係做嘢先，今次第一次拍打戲，自己努力學習中。」

張振朗傷頭博行運

至於張振朗早前拍攝時撞爆眉角要縫7針，監製笑言幾乎要改劇名為《奪命頭獎》，眉角依然貼有膠布的「地獄黑仔王」振朗笑指傷勢沒大礙，自嘲向來多經歷，問到是否開劇前沒有拜神？他說：「有拜神，仲攝咗太歲，受傷之後再去拜神，當應咗，每次受傷完之後嗰年都好旺。」談到高層樂易玲請來整容醫生為他縫針，笑問可有趁機執一執？他說：「冇呀，淨係縫針，唔會做啲旁門左道嘢，純天然！」對於女友楊偲詠談到他受傷時很淡定，他笑說：「因為佢知道我係一個真男人！」