全民造星4｜聖誕節總決賽見證女團誕生 TVB以《男神廚房》對撼ViuTV？

ViuTV選秀節目《全民造星IV》將於聖誕節（25日）喺九展舉行總決賽，由「大美人」李嘉欣﹑謝安琪﹑麥兆輝﹑谷德昭及魯庭暉擔任評判，透過直播模式見證女團誕生；而對手TVB竟以《男神廚房》迎戰？

《全民造星IV》20強入圍參賽者包括Ivy So（蘇雅琳）﹑Marf（邱彥筒）﹑穎蕎﹑暐翹﹑Ariel（曾家瑩）﹑Winka（陳泳伽）﹑Ada仔（姜咏鑫）﹑Candy（王家晴）﹑CK（黃斯琪）﹑Gao（沈貞巧）﹑李芯駖﹑Tengie（區廷均）﹑Win Win（楊安妮）﹑榛綦﹑So Ching（蘇芷晴）﹑超酸（陳昭煊）﹑VAL（趙展彤）﹑Yoyo（葛綽瑤）﹑Day（許軼）及Alice（許寶恆）。ViuTV雖然仲未為女團命名，亦未定好女團確實人數，但經理人Wing喺早前記者會透露希望人數方面會係10個以內，佢亦點名大讚Candy及Yoyo進步好大，而《全民造星IV》總決賽中頭三甲可以直入女團，相當具睇頭。

未知係咪因為要對戰《全民造星IV》搶收視，TVB就喺當晚8點半至9點45分播出早前已錄影嘅《男神廚房開業喇！》，由《男神廚房》冠軍男神譚俊彥、方力申、關禮傑、伍允龍及張馳豪（Aska）進行實體男神廚房，親自煮美食招呼80名食客；再由《拳王》大結局接力，講述石傲山（黎耀祥飾）搵昔日對手相談，將多年心結解除。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！