一年一度!全港4大榴槤放題/自助餐集合

榴槤控等足一年,終於又等到榴槤當造嘅時間啦。有酒店、餐廳甚至農莊都趁住呢段時間,推出榴槤放題或自助餐!榴槤控可以放任無限食啦~~

榴槤自助早午餐 唯港薈Silverbox 宴會廳

尖沙咀呢間酒店每年都會舉辦榴槤節,今年都唔例外。11場嘅榴槤自助早午餐將會喺7月尾起推出,到時可以一次過試齊5款唔同品種嘅馬來西亞榴槤果肉拼盤,包括有D197貓山王、高山XO等,仲有一款品種係首次引入香港!

另外,一如以往,同場有多款榴槤菜式同甜品以自助形式供應,例如避風塘榴槤豆腐、榴槤黃金麥皮蝦、榴槤糯米飯、榴槤芝士撻等,當然唔少得以足料榴槤果蓉製成嘅榴槤雪糕啦。榴槤控唔好錯過喇。

詳情:(按此)

期間限定:7月30日起之指定星期五至日

榴槤週末下午茶自助餐 大灣咖啡廳

紅磡呢間酒店唔止有榴槤晚餐,仲有榴槤下午茶自助餐!晚餐菜式多以榴槤入饌,例如炸榴槤鮮奶、以炭爐明火燒烤嘅榴蓮乞丐雞等,逢星期五六日更會每位成人免費送一份榴槤拼盤,包括貓山皇、紅肉D101、紅蝦或蘇丹王D24等唔同品種。

至於首度推出嘅週末下午茶自助餐,則集星、馬、泰、印、越等多國菜於一身,輪流登場嘅榴槤美食有榴槤薄餅、脆炸D24榴槤球 、D101港式榴槤西多士等。千祈唔好漏咗甜品,其中巴斯克蛋糕更加入咗榴槤肉製作呢。

期間限定:即日至8月底

90分鐘榴槤放題 貓山農莊

圖:農莊Facebook
圖:農莊Facebook

今次入西貢,唔食海鮮住喇,去食榴槤放題吖。呢個農莊趁住榴槤季,推出多場馬拉新鮮榴槤即開即食放題,每場限時90分鐘,有約3-5款時令榴槤,款式包括黑金貓山、紅蝦、葫蘆等,另外仲可以食到味道濃郁嘅老樹貓山王同黑刺榴槤等。

期間限定:15/7, 16/7, 17/7, 22/7, 23/7, 24/7
詳情:(按此)

榴槤放題 Pier 1929 (突發延期)

(原訂7月18-28日舉行嘅榴槤放題,因今早收到馬來西亞彭亨州當地果園緊急通知,遇上天氣反常而導致罕見嘅榴槤大失收,活動需要延期,有關發展請留意8月嘅通告)

灣仔碼頭呢間餐廳則推出2.5小時無限任食馬來西亞榴槤放題,榴槤由彭亨州直送,當中包括貓山王同埋另外4-5款神秘榴槤款式,全部都係樹上熟即時收果,再喺24小時內新鮮空運到港!

放題另包一人一份榴槤鹹甜點、榴槤燉雞湯,鹹甜點包括有D 24 榴槤芝士脆撻、榴槤朱古力、喇沙榴槤蝦多士等,其中最特別嘅可以話係D24榴槤菠蘿油,造型十足十真嘅菠蘿油一樣,以「牛油」其實係Bavarois混入D24榴槤果蓉製成。至於個燉湯,則以雞隻、榴槤白瓤、榴槤果肉等熬3個鐘,味道香濃,滋潤下火。

期間限定:預計8月

文:Kar