【香港小姐】冇緣入三甲唔緊要 細數過往獲無綫力捧落選港姐

《2020香港小姐競選決賽》喺噚晚圓滿落幕，結果由8號謝嘉怡、2號陳楨怡及4號郭柏妍，分別獲得冠亞季軍。其他佳麗雖然冇緣入三甲，不過都唔使失望，因為過往無綫都力捧過唔少落選港姐，而佢哋嘅星途分分鐘好過唔少冠亞季軍得主，而家就同大家數一數啦！

張可頤
張可頤喺1994年參選港姐，可惜五強止步。雖然無緣晉身三甲，不過亦成功入行。張可頤喺1995年就為劇集《一切從失蹤開始》擔任女二。被無綫力棒嘅張可頤，拍攝咗多部膾炙人口嘅劇集，當中包括《難兄難弟》、《九五至尊》、《茶是故鄉濃》、《金枝慾孽》及《女人最痛》等等。張可頤喺2005年與無綫改簽部頭合約，選擇北上拍劇，不過因拍攝劇集《長恨歌》而患上抑鬱症，又導致甲狀腺分泌失調，因此停工兩年醫病。2015年憑微電影《沿途有你》喺《第五屆金花獎頒獎典禮》奪得「最佳女演員」。另外佢喺上年宣布同商界女強人Laura合作成立經理人公司，做埋公司行政總裁。

郭可盈
郭可盈喺1993年參選港姐，雖然被大家視為冠軍嘅大熱門，可惜最終三甲不入，只獲得「最受傳播媒介歡迎獎」及「最具演藝潛質獎」。之後，佢簽約無綫成為藝人，多年嚟佢主演過好多唔同類型嘅電視劇，更有唔少經典角色，例如《刑事偵緝檔案》高婕、《Ｏ記實錄》伍頌蓮、《創世紀》岑穎欣、《創世紀II天地有情》高美娜、《青出於藍》王若詩及《富貴門》董令姿等等。2004與林文龍結婚，2010誕下囡囡林天若（津津），便將所有心機投放喺家庭上，逐漸淡出幕前。

陳妙瑛
1993年參選港姐嘅陳妙瑛，以半熱門晉身五強，最終三甲不入但獲得「最美麗相中人獎」。佢喺加入無綫就隨即備受力捧，仲參演咗多套深受觀眾喜愛嘅劇集，例如《西遊記》、《洗冤錄》、《金玉滿堂》、《洗冤錄》及《無頭東宮》等等，成為無綫當家花旦之一。正值事業高峯期嘅陳妙瑛，喺2001年選擇約滿後離巢，2005年更淡出娛樂圈，現時佢已經喺一位商界女強人。

周海媚
周海媚喺1985年參選港姐，可惜未能晉身決賽，其後佢隨即加入無綫藝員訓練班。加入無綫後即備受力捧，多年嚟參演過唔少劇集，當中不乏代表作，例如《義不容情》、《流氓大亨》、《回到未嫁時》、《情濃大地》、《天地豪情》及《大鬧廣昌隆》等等，成為無綫當家花旦之一。另外，如果講到《倚天屠龍記》周芷若，相信唔少人都會諗起1993年周海媚版本，當年佢憑劇集角色深得觀眾愛戴，受封「最美周芷若」，紅遍中港台。周海媚喺1998年患上紅斑狼瘡症，雖然被迫停工，當時主要以接拍內地廣告為生，甚少喺劇集見到佢。喺1998年後，佢將演藝重心轉返內地，喺無綫只係拍咗三套劇集，分別喺2009年《學警狙擊》、《蔡鍔與小鳳仙》及2013年《神槍狙擊》。

高海寧
本身係模特兒嘅高海寧（高Ling），喺2008年參選港姐，賽前大熱但可惜五強止步，只能獲得「旅游大使獎」。高Ling喺入行初期，因擁有驕人身材而被封為「TVB新一代咪神」，雖然演出機會不斷，但大家只著眼喺佢身材上，更被冠上「花瓶」稱號。近年佢不斷努力及重新打造演員形象，憑多次出色表現，逐漸成功擺脫花瓶形象。高Ling喺上年播出嘅《婚姻合伙人》中飾演Kimchi，首次擔正做女一。近排高Ling仲劇接劇咁輪住播，先後喺《殺手》、《迷網》及《反黑路人甲》都有佢嘅演出，憑努力成功獲得觀眾及網民肯定。

湯洛雯
嚟自演藝世家嘅「靚湯」湯洛雯 （Roxanne），叔叔是係無綫五虎湯鎮業，而爸爸就係湯鎮宗，所以喺2012年參選港姐時已經備受關注。身為港姐冠軍大熱人選嘅Roxanne，最終六強止步，只奪得「旅遊大使」獎項。雖然未能晉身三甲，不過Roxanne可以極速加入劇組，佢更憑處境劇《愛·回家》飾演李思思一角成功入屋。另外，大家印象最深嘅嘅一定係主持《學是學非》，同一班是非精一齊以輕鬆手法講解科學上嘅知識，唔少網民都大讚佢自然唔造作。之後，佢嘅演出機會越嚟越多，，例如《完美叛侶》、《與諜同謀》、《心理追凶 Mind Hunter》、《燦爛的外母》、《心理追兇Mind Hunter》及《丫鬟大聯盟》等等，憑住不俗嘅演技獲得網民支持，成為無綫力捧上位小花之一。

李施嬅
李施嬅（前名李詩韻）喺2003年參選港姐時，雖然係大熱門，不過最後只係獲頒「最上鏡小姐」及「才藝小姐」獎。加入無綫後，佢參演多套無綫劇集，例如《天涯俠醫》、《老婆大人》及《最美麗的第七天》等等，直至2011年《紫禁驚雷》飾演端敏格格，演技獲得觀眾讚賞，及慢慢步向女主角位置。佢嘅演技唔止香港人認同，連外國人都一致肯定，佢喺2017年憑美國微電影《Once More》中飾演Selina一角，奪得《European Cinematography Awards》及《Los Angeles Film Awards》最佳女主角，成為雙料影后，揚威國際，其後更喺2018年離開無綫，簽約美國經理人公司成為旗下藝人，宣布進軍荷里活。喺上年，已離巢嘅李施嬅憑《金宵大廈》飾演嘅空姐Alex及舞廳大班CoCo，人氣急升，更獲得「最受歡迎電視女角色」獎。雖然佢演技精湛，但多年嚟一直與視后無緣，認為無綫欠佢一個視后，所以網民封佢為「民間視后」。李施嬅原本喺加拿大拍攝劇集《血與水》（Blood & Water)，不過因疫情而被迫停工，現時只好靜待消息，等安排拍攝餘下嘅戲份。另外，《金宵大廈》叫好又叫座，無綫早前落實開拍續集，而女主角李施嬅亦願意繼續演出，大家到時記得留意喇～

黃智雯
曾任空姐嘅黃智雯（Mandy）喺2007年參選港姐，可惜最終五強止步。2008年隨即被安排入讀藝員訓練班，Mandy正式開始佢嘅演藝生涯。喺入行初期，佢都係飾演一啲唔起眼嘅角色，直至《巴不得爸爸...》飾演蘇鳳蓮一角開始備受關注。之後，佢嘅戲份越嚟越多，亦有唔少經典角色，例如《搜下留情》鵪鶉妹、、《缺宅男女》關二嫂、《On Call 36小時》洪美雪及《飛虎II》蘇文強等等，慢慢晉升成為無綫當家花旦。2015年喺《拆局專家》首次擔正做女一，前年更憑《三個女人一個「因」》飾演患有多重人格症嘅大律師方以因，演技備受觀眾肯定，兼勇奪「馬來西亞最喜愛女主角」及「新加坡最喜愛女主角」成為雙料視后。今年Mandy已經有《十八年後的終極告白》及《降魔的2.0》出咗街，嚟緊仲會有《使徒行者3》及《刑偵日記》，鍾意睇Mandy做戲嘅朋友就唔好錯過喇！

麥美恩
麥美恩（Mayanne）係2011年香港小姐殿軍得主，入行後主要向節目主持發展，例如《無綫娛樂新聞台》、《娛樂頭條》、《學是學非》、《粵講粵㜺鬼》、《Ben Sir睇樓團》及《森美旅行團》等等，更憑《學是學非》「是非精」而人氣急升。另外，佢亦慢慢踏上司儀之路，喺多個無綫大騷擔任司儀，包括《歡樂滿東華》、《明愛暖萬心》、《香港小姐競選》、《萬千星輝頒獎典禮》及《勁歌金曲頒獎典禮》等等。傻大姐形象入晒屋嘅Mayanne，性格爽直又親切，深受觀眾及網民歡迎，喺《萬千星輝頒獎典禮2017》揮低強勁對手，勇奪「飛躍進步女藝員」。

蔡嘉欣
以KOL身份參選港姐嘅蔡嘉欣（Kayan），喺未參選時已經有一定嘅知名度，更曾為ViuTV節目《#返鄉下》及《Trip精》擔任主持。佢喺上屆參選時可以話係「人氣王」，不過可惜大熱倒灶，與三甲無緣，只獲得「最迷人豐盈美唇大獎」。喺加入無綫後，佢已經極速開工，明顯備受力捧。除咗為節目《眼睛去旅行》及《姊妹淘》做主持之外，佢亦被安排拍劇工作，好似早前佢就開始已經為《飛虎3壯志英雄》進行拍攝。