再拍劇圓多年心願 梁朝偉：最後階段重溫吓

影帝梁朝偉主演的英皇電影《無名》昨晚舉行首映禮，場面熱鬧。休息逾年的他明言暫時未想結束假期，談到早前開口想再拍電視劇，他竟引伸到「退休宣言」，聲稱想在最後階段重溫剛入行的種種回憶。

偉仔在《無名》有場重頭戲，與內地演員王一博肉搏，相當吸睛，但他覺得今次拍打戲不算太辛苦，最深刻反而是先後聘用了兩位普通話老師，教自己背誦對白：「有場戲啲對白好長，不過日日練就OK。」仍在假期中的他又坦言：「原本要開工喇！但又覺得未恢復。（仲想去邊度旅行？）冇呀！已經冇雪滑喇！」

談到開設社交網帳戶，偉仔笑說：「都係想分享吓人生經歷，同埋一啲工作上嘅睇法，我以前睇好多出色演員嘅自傳，想承傳落去，不過我唔係好識玩，加上唔想講咁多私生活嘅嘢，所以應該唔會多拍片。」談到將於本月12日舉行的《亞洲電影大獎》角逐影帝殊榮，他謙稱：「比較睇好《Drive My Car》嘅西島秀俊，我就盡咗力，得獎與否冇乜所謂，入圍已經好開心！」

冇份爭金像獎唔失望

早前他曾表示想再拍劇，偉仔說：「呢個諗法幾年前已經萌起，因為已經係最後階段，好想重溫吓，同埋完成自己嘅心願。我入咗行40年，都差唔多喇！作為演員好需要體力及精力，已經冇咁多能量足以應付。（返無綫拍？）唔會喇！依家拍電視劇同以前已經唔同，有好多串流平台，多咗選擇。」今年他未有入圍金像獎，偉仔大方回應：「唔失望，唔同人有唔同睇法，而且金像獎鼓勵咗我咁多年，依家佢哋都要鼓勵吓啲新演員喇！」

同場還有衛詩雅、湯怡、許靖韻及郭思等，談到好友陳家樂結婚，衛詩雅說：「我會做兄弟，而我6歲好鍾意佢嘅姪女就做花女。（姪女好傷心？）情傷呀！不過佢都有拍片祝福家樂哥哥，又讚佢同連詩雅係靚仔靚女。」湯怡則笑說：「我結婚嗰時冇請家樂，都驚佢結婚唔請我，哈哈！不過我知我喺賓客名單上，希望佢快啲生隊足球隊出嚟，同我個女玩。」