分享風呂式出汗減磅大法 黎明騷舞功 獲Sammi大讚狂野

【星島日報報道】前晚到紅館捧場的圈中人包括Leon的契爺胡楓（修哥）、霍啟剛與太太郭晶晶、林嘉欣與導演老公袁劍偉、蔡一傑及童愛玲等。Leon和Sammi前晚合體大唱《信者得愛》，Leon戴黑超在Sammi身邊為她伴舞又Rap歌，令Sammi驚喜大叫：「Leon跳舞呀！」全場觀眾為之歡呼尖叫！

Sammi其後在社交網分享台上精采一幕，笑言：「Mi的《信者得愛》成功打開了Leon的……腿和腳！黎生跳舞！好狂野！城城見到應該會雙腿發軟怯一怯。」

Sammi：好有畫面

Leon又在台上趁機跟Sammi分享「出汗」心得，他公開自己用日本風呂式Keep Fit方法。「首先開個Bath，除衫然後浸落去。」Sammi聽後不禁大叫：「嘩，好有畫面喎！」Leon續說想像自己在日本，聽風呂音樂浸20分鐘，起身着浴袍，房入面開28度空調，食一碗辣麵，坐15分鐘，流一身汗之後肯定少了3至4磅。Sammi更笑言會「流鼻血」：「又浴缸又除衫，好有畫面……見到你啲肥肉呀！現時冇，現時好fit！」

被爆好飄好迷離

講到興起，Sammi忍不住爆Leon料：「我要爆黎明少少嘢，佢唔知由幾時開始個人好飄、好迷離。幾年前佢打電話俾我，話想幫我監製一首歌。我心諗：乜你識監製歌嘅咩？心里滿是疑問，不過見你係黎明就好啦！」Sammi所指就是雷頌德為她寫的歌曲《犀利》，她續爆Leon當時更說要幫她拍MV，她笑言：「MV？於是我上網查吓你拍過咩MV。點知有一日，你又話我知唔得閒，唔幫我拍MV啦！嘩，乜你咁飄嘅？你啲節奏好難跟呀！」Leon也坦言：「我知我成日講嘢斷片，生活都係咁。（啲人話生咗仔會無記性。）又唔係我去生。（生女可能會好啲。）可能係，哈哈哈！」

■鄭秀文唱《信者得愛》時，獲黎明伴舞。

■黎明與鄭秀文這對舊拍檔，於廿多年前合作電影《愛你愛到殺死你》。

■霍啟剛與郭晶晶原來都是黎明的粉絲。

■胡楓捧場力撐契仔黎明。

■久違的童愛玲前晚捧場。

■自從女兒出世後，黎明的「禁忌」少了很多。

娛樂