勁爆記者會 華納繼續No Show 欣宜風騷企中間 等攞大滿貫

鄭欣宜與許廷鏗老友鬼鬼,如果能一齊捧獎就更開心喇!
鄭欣宜與許廷鏗老友鬼鬼,如果能一齊捧獎就更開心喇!

鄭欣宜今年在樂壇走勢凌厲,大有機會成為「大滿貫女歌手」,難怪在頒獎禮活動大合照時企C位的她表現超風騷,如其桃紅裙一樣搶眼。而出席撐場的歌手多達45個單位,連未能到場的男團MIRROR及ERROR亦有派員拍片支持,唯獨華納唱片公司連續第2年全體「缺席」,似乎相當唔畀面。

《新城勁爆頒獎禮2022》將於12月29日假會展舉行,昨日各大唱片公司及獨立歌手多達45個單位雲集記者會,包括鄭欣宜、許廷鏗、馮允謙、曾比特、CY及陳柏宇等,其中泳兒及陳葦璇以性感打扮現身。雖然最具人氣的男團MIRROR未有現身,但現場播出成員Lokman、Alton及Tiger,以及組合ERROR成員肥仔及保錡拍攝的短片,約定歌迷在頒獎禮上見,唯獨華納旗下歌手「人不到,連影都冇」,雖然去年電台與華納、環球及SONY的HKRIA續約問題已解決,環球與SONY亦跟電台重修舊好,但華納已是第2年缺席頒獎禮記者會。

許廷鏗唔知「被安排」破冰

欣宜對於「大滿貫女歌手」名銜表現受落:「我唔介意攞,希望大家支持。(邊位係勁敵?)個個都係,個個都好努力,不過結果如何都唔會影響我嘅音樂路。」她透露明年3月的紅館演唱會嘉賓是「不得了」:「係邊個唔講得住,不過今次會呈現上次紅館個唱做唔到嘅嘢。」她又主動為好友許廷鏗的12月九展個唱宣傳,許廷鏗則表示屆時綵排中途亦會出席是次頒獎禮以示支持。對於被欣宜爆指不戒口照食燒鵝瀨,他即辯稱只吃了瘦叉鵝瀨:「雖然要減肥,但身體需要好味嘅嘢,所以同身體磋商吓先。」他又指個唱開四面台又要跳舞,故認為要有力量及健康,欣宜即祝他「邊邊有力」。問到吳若希望他與胡鴻鈞破冰,他說:「我唔知喎,我會去支持吳若希(演唱會),都希望上台。(同胡鴻鈞了解吓?)我再問吳若希啦!」

而新城知訊台執行總監程凱欣對於華納歌手缺席,表示早在11月已邀全港唱片公司,但早前收到對方表示「嚟唔到」,現時不確定對方可會出席頒獎禮;而華納方面則回覆:「各歌手有工作在身。」

多個歌手組合單位出席頒獎禮記者會,場面熱鬧。
多個歌手組合單位出席頒獎禮記者會,場面熱鬧。
泳兒型格打扮,內襯低胸裝現身。
泳兒型格打扮,內襯低胸裝現身。