十大網紅榜︳MIRROR一個都冇 商台DJ阿正成4月冠軍 TVB藝人得佢入十大

社交媒體分析公司Cloudbreakr以數據得出每月十大網紅榜，4月份十大名單之中，紅透半邊天嘅MIRROR居然冇一位成員打入榜內。4月生日嘅姜濤、4月派新歌嘅Edan呂爵安、拎到Chill Club頒獎禮男歌手金獎嘅Anson Lo盧瀚霆，全部冇份！

至於冠軍人物，係商台DJ阿正（黃正宜）。阿正憑ViuTV節目《膠戰》嘅癲喪表現人氣急升，早前嘅《Go!執！事務所》更直搗香閨拍攝，自揭屋企有幾混亂，深受網民歡迎。而同樣憑《膠戰》彈起嘅岑珈其喺4月人氣榜排第3。

亞軍係居港加拿大model Taylor R，唔講唔知佢嘅IG有56萬人追蹤！想做媽媽嘅Taylor以人工受孕方式成功陀B，今年3月誕下Levi。

其餘十大人物可以分成幾類，唱作人有陳蕾同湯令山分別排第4及第5；《全民造星》出身嘅MC張天賦及ERROR成員保錡排第6及第8；「試當真」嘅許賢排第7，自爆戀情嘅游學修喺第9位。唯一一位TVB藝人係「港版子瑜」區明妙，排第10位。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！