叱咤預測 ︳張敬軒RubberBand爭至尊歌 生力軍MC張天賦鬥Edan呂爵安難分難解

繼續預測商台2021年度叱咤樂壇流行榜頒獎典禮賽果，今日會分析「專業推介 叱咤十大」及「叱咤樂壇生力軍」等大獎嘅結果，其中生力軍男歌手競爭十分激烈，至今仍難言金獎誰屬。（以903專業推介2020年第50周至2021年50周成績推算）

專業推介 叱咤十大

頒予十首喺叱咤903播放率最高歌曲，播得最多嘅會獲得「叱咤樂壇至尊歌曲大獎」。根據商台903專業推介歌曲成績，以下冠軍歌曲上榜時間最長並且多個星期逗留十大位置︰

RubberBand 《Ciao》

張敬軒《俏郎君》

泳兒《荊棘海》

MIRROR 《Boss》

林家謙《神奇的糊塗魔藥》

C AllStar《集合吧！地球保衛隊》

鄭融《多喝水》

岑寧兒《風的形狀》

盧瀚霆 《Megahit》

柳應廷《狂人日記》

衛蘭 《It's OK to be Sad》

林海峰 《UNCLE》

即使有網民自發全天候統計播放率，但係實際數字以至截數日期都同商台有出入，現時估計柳應廷《狂人日記》、衛蘭 《It's OK to be Sad》及林海峰嘅 《UNCLE》形勢較為「邊緣」，三首只能活一首，但衛蘭喺周數同停留三甲位置較多而「領先」。出道15年嘅泳兒有機會繼生力軍金獎之後，再度踏上叱咤頒獎台。同樣有機會首次獲得叱咤十大嘅仲有Anson Lo盧瀚霆、林家謙及岑寧兒。

至於「至尊歌曲大獎」相信係RubberBand《Ciao》及張敬軒《俏郎君》之爭。前者食正今年移民潮，聽眾有共鳴；而收錄《俏郎君》嘅專輯The Brightest Darkness係「至尊唱片大獎」大熱，或者會影響獎項分配。

預測 - 叱咤樂壇至尊歌曲大獎 : RubberBand - Ciao

叱咤樂壇生力軍

今年香港樂壇再受注目，出道新人/組合數量接近20個，叱咤繼2012年後再次將生力軍分為男/女歌手及組合。過去能夠拎到903專業推介冠軍歌嘅生力軍，幾乎等於入硬三甲，但至今已經有5首冠軍歌由新人包辦，難怪要3個獎變9個。

生力軍男歌手金獎競爭可以用「瘋狂」形容，同樣出身於《全民造星》嘅Edan呂爵安同 MC張天賦各有一首冠軍歌。假如截數日期係以第50周計，牌面上Edan歌曲數量、上榜周數稍為佔優，兼且有2首亞軍歌，相信能夠險勝MC。至於銅獎就幾乎肯定落於以《我不如》奪冠嘅Mike(曾比特)。

生力軍女歌手反而係銀銅獎有懸念，會由Kerryta、炎明熹及姚焯菲競爭。三位女歌手都係有一首歌上榜，同樣最高上過亞軍，炎明熹嘅《真話的清高》停留榜上較耐，拎銀獎機會較大；Kerryta同Chantel機會接近，不過商台會唔會一次過頒晒2個生力軍俾TVB聲夢幫？話晒叱咤頒獎禮當晚TVB都有新年SHOW，而聲夢幫係演出單位之一。金獎如無意外將會由擁有冠軍歌嘅華納新人張蔓姿奪得。

組合名單可以話係塵埃落定，金獎係二人電音樂團石山街，銀獎係MC $oho & KidNey，銅獎係年尾派歌趕上尾班車嘅PIX3L。

其他大獎預測 －

叱咤樂壇至尊唱片大獎

C AllStar 《人類世》

叱咤樂壇唱作人

金獎 － 林家謙 ／銀獎 － 林奕匡 ／ 銅獎 － 馮允謙

叱咤樂壇作曲人

林家謙

叱咤樂壇填詞人

黃偉文

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！