叱咤︱Anson Lo爆冷揮低姜濤勇奪「我最喜愛的男歌手」

叱咤︱Anson Lo爆冷揮低姜濤勇奪「我最喜愛的男歌手」

《叱咤樂壇流行榜頒獎禮》「我最喜愛男歌手」一獎賽果出人意表,MIRROR成員Anson Lo成功擊敗賽前大熱隊友姜濤首度奪此得獎。由於上年DJ林海峰(Jan)宣布姜濤攞獎時,先噏Anson Lo個名,令他誤以為得獎,企咗起身,令場面有點尷尬,事後Jan更引起歌迷抨擊,所以今晚Jan笑言吸收受過上年教訓,他痛定思痛,今次只會講一次得獎者個名,當他宣布係:「盧瀚霆!」見Anson Lo有點猶豫,可能驚再次被玩,唔敢走上台,Jan說:「使唔使我落嚟頒。」他才上台領獎,但他有點惘然說:「我個腦停晒,多謝投我票嘅觀眾朋友,呢一年對我哋MIRROR唔係容易嘅一年,但我哋每一日都不停努力咁工作,我承諾攞獎與否都會比2022更加努力做好每份工作,我一定唔會懶,一定會盡我2000%努力去做。」

姜濤憑《作品的說話》冧莊奪得「我最喜愛的歌曲大獎」,得獎上台致謝詞時說:「多謝姜糖,呢隻歌其實最緊要嘅message都喺首歌度,就係世界和平,希望大家關注自身之餘,都多啲關注呢個世界,我希望喺我作品裏面,一步步實現畀大家。

而男圑MIRROR再上台獲「叱咤我最喜愛的組合」獎,11子一字排開獻唱《We All Are》時,姜濤情緒帶點激動而唱不到歌,有Ian拍膊頭以示支持,至於眼濕濕的Anson Lo亦受「感染」,唱得相當細聲,而Ian唱到一半歌時,亦「失守」而無法唱下去。至於「我最喜愛女歌手」由鄭欣宜奪得!

《叱咤》頒獎禮全滿落幕,方皓玟、Serrini、許廷鏗、陳柏宇、林奕匡等雖然食白果,但都坐足全場,唱作歌王林家謙個人囊括了7個獎項,包括《邊一個發明了ENCORE》的作曲,和有份參與的編曲及監製獎,成全晚大贏家,馮允謙都有三個獎在手,包括男歌手和唱作人銀獎,以及憑《Freakin' Nightmare》得叱咤十大第十位,女歌手方面鄭欣宜連奪女歌手金獎及「我最喜愛的女歌手」,MIRROR團隊、以及成員姜濤、陳卓賢各有兩個獎,而Anson Lo和Jeremy則各一,他們合共攞到八個獎,而師妹COLLAR都擸咗兩個獎,MC張天賦跟樂隊Dear Jane都各有兩個獎。