吃貨橫掃曼谷︱彭慧中感事業停滯不前：唔想畀人哋唔記得咗我

TVB旅遊節目《吃貨橫掃曼谷》搵嚟高海寧（高Ling）、彭慧中（Phoebe）、陳星妤（Yvette）及「少年廚神」林澄光（Michael）擔任主持，帶大家食盡玩盡曼谷；三位靚女主持仲性感上陣，向觀眾大派福利。

節目最新一集就講到高海寧與彭慧中前往一棟由1940年代建築改建而成嘅精品酒店共進午餐，實行一邊食好西一邊傾心事。高Ling一開始對就Phoebe話自己喺網上見到啲人覺得公司欠你一個交代，覺得佢喺事業上值得擁有更多，仲話自己覺得Phoebe係一個好認真及用心嘅人，好似今次拍旅遊節目Phoebe會預先網上做功課，等拍攝時可以多啲嘢講，而呢樣嘢佢好欣賞。

對於高Ling咁講，彭慧中就話好多人都覺得公司欠佢一個交代，而佢自己都覺。不過之後佢再補充話唔係欠一個交代，佢都有做旅遊節目及主持，只係較少拍劇機會，不過最近終於接拍咗一個有角色嘅劇集。而Phoebe亦認同高Ling講欠缺機會：「都成12年喇，其實真係真心講句，我覺得自己嘅事業係停滯不前嘅感覺。尤其係每一年都有新嘅同事同港姐，佢哋好似一出嚟就有好多工作機會，好快就已經做女主角，又做好多大騷。其實我唔介意，俾咩我做都好，我係唔想畀人哋唔記得咗我，好容易咋嘛。」

高Ling聽完就眼濕濕話：「 我都好明白，我都有年半冇做過嘢，啲人喺街度都會問『高Ling好耐冇睇過你嘅電視劇啦』，跟住都會諗已經冇存貨喇喎～」最後佢哋互相支持大家，握手嗌「加油」。

33歲嘅彭慧中係2010年落選港姐，有指當年因太多負面新聞而無緣三甲。Phoebe入行後拍劇機會甚少，主要擔任節目主持工作。憑《激Fun紐西蘭》開始獲觀眾及網民注意，15年加入《都巿閒情》及到轉名嘅《流行都市》做主持，憑招牌長腿及34D驕人身材而人氣急升，成為唔少網民心目中嘅女神。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！