合唱情歌開心又緊張 姚焯菲得米與MC過「2人世界」

「國民初戀」姚焯菲（Chantel）追星成功，向來視歌手MC張天賦為偶像的她，前晚跟MC合唱情歌，加上因炎明熹缺陣，令原定3人行變成2人世界，不過2人完全沒有身體接觸，就連拖手仔也欠奉，僅是同台以歌聲交流，Chantel坦言心情既緊張又開心。

前晚《叱咤樂壇Brand New Live生力軍音樂會》在亞博舉行，出席歌手包括MC張天賦、姚焯菲、ANSONBEAN、ERROR成員193和肥仔等。而原定有份演出的炎明熹、MIRROR成員Edan及Lokman則未能到場。

Chantel與MC在音樂會中合唱兩首英文情歌，講到心情，她坦言：「好開心，因為佢唱歌好好聽，但都有少少緊張，不過我之前上過呢個台，所以習慣少少。」對於Chantel的表現，MC指前一天有一齊綵排，大讚對方歌聲悅耳，問到兩人會否有牽手等親密動作，他們表示不會，問是否擔心粉絲呷醋？MC否認：「唔關事，係導演意見，佢講乜我做乜。（如果導演要你錫呢？）咁要問公司。」

對於好友炎明熹（Gigi）因確診新冠肺炎而未能出席，Chantel自言掛念對方：「本來諗住一齊驚，本身係我同佢、MC三個一齊合唱。（你依家可以獨霸MC？）我都有啲唔開心，但戥Gigi開心，可以喺屋企休息。」

自認唔夠「勁敵」Lucy可愛

另外，有傳MC將在紅館開騷，他稱未清楚場地：「我都恨喺紅館開騷。（擔唔擔心唔夠歌？）都擔心，所以要做多啲歌，如果唔夠歌，就請啲歌星朋友做嘉賓。（可以請李元元Lucy？）都得，佢有哼過我啲歌，或者可以為我伴舞。」Chantel被指有Lucy作為勁敵時，她謙稱不夠對方可愛，問MC會揀Lucy還是Chantel？MC笑言：「睇吓要乜，可愛就揀Lucy，唱歌就揀Chantel。」而Gigi特別拍片支持，見她戴眼鏡及Cap帽上陣，精神不俗，她在片中清唱了兩句新歌《焰》，並說：「我已經好咗好多，大家有冇掛住我？我好掛住大家，我自己好孤獨，希望快啲好番見到大家。」