唔恨生仔 買大送細仲好 周家怡冇人吼 帶子洪郎照殺

藝人周家怡與潘燦良於新劇齊齊「湊仔」，大讚童星們聰明，不過卻異口同聲表示當父母責任重大，未有打算接受挑戰。家怡自嘲身邊「烏蠅都冇隻」，容易憑感覺動情的她覺得目前「最安全」。

周家怡與潘燦良於ViuTV新劇《反起跑線聯盟》內分別演單親媽媽及單親爸爸，劇情交代潘燦良發現與家怡相當啱傾，竟借故親近對方兒子展開追求。兩人大讚「兒子們」聰穎，令他們對照顧小朋友改觀，不過卻異口同聲未打算改變初衷「挑戰」生育，潘燦良坦言：「都過咗（生育期）啦，好佩服夠膽生仔嘅，呢個責任維持一世，會擔心自己做得唔足，所以諗起都驚！」

潘燦良冇工開陪蘇玉華

未婚的家怡隨即接口：「我試過帶契仔去主題樂園，返到嚟發開口夢話自己好攰！坦白講生得都想自己湊番，唔做嘢就要有一定嘅經濟基礎，所以都有啲卻步。」問到自稱單身很久的她，會否考慮與帶子洪郎交往？她即爽快回道：「係又冇乜所謂呀，慳番唔使自己佗同生添，去到我哋呢啲年紀仲邊有得你揀？（唔心急拍拖？）過咗嘞，完全冇追求者。（要求對象有乜條件？）我好衰，鍾意憑感覺，好易跌落去、跌得好深，一啲都唔瀟灑，所以真係驚咗，反而依家（單身）好安全。」

家怡坦言初戀拍足8年，後來因「感情淡咗」變回陌路人。當問到今次如何學做「人母」時，她說：「我喺屋企日抱夜抱洋娃娃去攞感覺，搞到父母以為我黐線，哈哈！同埋成日幻想自己佗B囉！」她又指與多次合作的潘燦良默契相當，合作愉快。而潘燦良則自爆即將當「量地官」﹕「下半年暫時未有工作安排，不過我覺得唔算好差，比好多人幸運嘞。（利用時間陪太太蘇玉華？）我哋會煮吓嘢食，留喺屋企睇吓戲。」