嘉玲逝世︳TVB綠葉黃栢文 原來係嘉玲長子 不公開關係有苦衷

前日粵語片女星嘉玲逝世後，不少報導都提及嘉玲同四哥謝賢嘅一段情，以及嘉玲同丈夫姚武麟婚後移居泰國，並育有兩子一女，但原來嘉玲仲有一段不為人知嘅關係，同前度所生嘅兒子更加係娛圈中人。

尋日有消息提及，嘉玲入行前曾經誕下一子，但不久後分開。由於當時嘉玲紅極一時，所以從未有公開產子一事。而嘉玲呢位長子，正是近年喺TVB成為「御用惡人」嘅黃栢文。黃栢文幼年時同父親到外國生活，8歲先返香港，當時嘉玲主動同佢相認，母子一路有聯絡。傳媒向黃栢文求證時承認此事，表示本來同嘉玲關係疏離，長大後了解更多先至比較親密，佢過去亦有到泰國探生母，亦會帶個女去見嫲嫲。黃栢文透露嘉玲近年身體轉差，已經有兩三年卧病在床。黃栢文將會飛往泰國，協助弟妹處理母親後事。

至於點解一路冇公開關係，黃栢文受訪時解釋，當年演藝界嘅風氣，嘉玲唔適宜公開秘密生子呢件事。到後來黃栢文自己都入行，佢亦唔想外界知道嘉玲係佢阿媽，以免有壓力，而且嘉玲演藝事業成功，黃栢文自己做得唔好的話會令兩母子都受影響，於是隻字不提。

64歲嘅黃栢文喺TVB藝訓班畢業，同屆同學有呂良偉、陳玉蓮、廖偉雄等，後來轉投電影界，同李修賢合作無間，做勻演員、策劃同導演。1988年執導電影《霹靂先鋒》，以新人姿態參演嘅周星馳憑該片奪得金馬獎最佳男配角。年初TVB劇《青春不要臉》入面，監製林肯搵返黃栢文飾演導演，將佢賞識以周星馳為藍本嘅舟仔演出電影嘅情節重現，就連舟仔試戲嘅段落，都真係《霹靂先鋒》其中一幕。後來黃栢文因為患癌退居幕後，90年代中期移民加拿大，千禧年回流，到2012年簽約TVB成為藝員。值得一提嘅係，原來黃栢文同著名填詞人黃偉文份屬堂兄弟。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！