土耳其地震｜港紅十字會派員支援災區 嘆復修工作漫長 籲港人持續關注

【Yahoo 新聞報道】土耳其早前發生7.8級大地震，傷亡枕藉，多個國家及地區均有派員救災。香港紅十字會亦有派出三人，到土耳其作人道支援救災工作。有隨團隊員指，土耳其地震後仍面對漫長復修工作，除了重建損毀建築物，「重建生活都好艱難」，希望香港人繼續關心土耳其災民。

攝影記者：Davies

香港紅十字會派出代表Eleanor、Elaine和Josh，上月12日起到土耳其地震災區加濟安泰普（Gaziantep）及卡赫拉曼馬拉什（Kahramanmaras）視察，了解當地救災情況及救援物資需要，亦於當地兒童友善空間照顧及陪伴受地震影響的兒童。

現階段捐款更勝捐物資

Eleanor指，現時港人捐予土耳其居民的善款已達1,600萬港元，同時亦捐出不少物資。她指此行亦希望了解「點樣先最幫到啲災民」，作協調工作，「每次嘅災害都要好具體咁睇天氣、環境、社會文化，令到啲資源分配得有效率、唔會為當地人帶來麻煩或者傷害」。此行過後，他們亦發現現階段物資對災區來說並非最重要，「今個星期要嘅嘢，下星期已經可能收集到太多，積住喺機場仲要搵人處理」，加上香港距離土耳其較遠，運送物資需時，「一啲現金捐款係更幫到佢哋」。

Eleanor 是香港紅十字會的總監（服務），曾於2008年汶川大地震前往賑災，雖有經驗，但她現時回想仍心有餘悸，「由安卡拉去災區要揸車7個鐘，當我哋架車駛入市中心、開始見到廢墟，架車係全車人靜曬，大家一句說話都無講，個畫面好震撼」。當時搜救工作已基本完成，「睇住個畫面，你想像到啲廢墟曾經做成幾大嘅傷亡。個心好悒，廢墟入面好多個人物品留咗喺度……物品主人而家去咗邊、係生係死、受咗傷定點樣，我哋都唔知道」。

與災區小孩緊緊擁抱

香港紅十字會署理高級項目協調主任Elaine一直負責緊急健康方面的工作，隨團到土耳其後到訪災區的兒童友善中心，「佢哋喺入面可以做返小朋友、可以去玩、參加活動」，土耳其紅新月會亦有派心理學家在場支援。Elaine與Eleanor、Josh於兒童友善中心內，與災區小孩一同唱歌跳舞，Eleanor指「佢哋真係好開心有其他地方嘅人嚟咗，我哋畀到個信息佢哋知，其實佢哋係唔孤單，You are not alone」。在場亦有不少小朋友在跳舞和遊戲之後，緊緊擁抱「大人」，Eleanor指他們需要一定安全感。

三人到達土耳其後，幸而沒有遇到餘震，不過在零度的天氣睡帳篷、沖凍水涼亦不是味兒，「第一時間返到香港都係想洗頭沖涼」，但Eleanor強調今次探訪稱不上苦差。以汶川大地震的經驗得知，「香港紅十字會喺四川地震之後，喺嗰邊做咗十年嘢，唔止係重建，要重建生活係好艱難」，希望香港市民繼續關注災情，支援土耳其災民。

紅十字會捐款途徑：

網上捐款：http://link.redcross.org.hk/23tsefbcn

更多捐款方法：http://link.redcross.org.hk/23tsefbtc

指定捐款日期：3 月 2 日截止