大事回顧︳重建追星熱潮 MIRROR改變娛圈生態 幫ViuTV賺近1億

由《全民造星》參加者組成嘅男團MIRROR,喺2021年人氣大爆發,所到之處人頭湧湧,街頭巷尾都會見到佢地嘅廣告,亦令到追日韓台星多年嘅香港觀眾,再次對香港藝人產生興趣。樂壇亦一洗過去幾年頹勢,唔少新人以至獨立音樂人都備受注目,MIRROR爆紅已經唔止係娛樂話題,更加係社會議題。

MIRROR今年大爆發始於元旦,2020年度叱咤樂壇流行榜頒獎典禮上奪得「叱咤樂壇組合銅獎」、IGNITED一曲獲「專業推介 叱咤十大」第3位。個人發展嘅Jer及Anson Lo分別獲得「叱咤樂壇生力軍」金獎及銅獎;姜濤更贏得由樂迷票選嘅「我最喜愛的男歌手」,另外以《蒙著嘴説愛你》奪得「我最喜愛的歌曲」大獎。姜濤成為叱吒史上呢兩項大獎嘅最年輕得主。以6項大獎揚威叱咤後,MIRROR人氣出現微妙變化。

不久之後,成員Edan(呂爵安)以單飛姿態推出首支單曲《E先生連環不幸事件》奪得3大電台流行榜冠軍,MV至今觀看次數過千萬,以香港歌手計絕對難得。3月,ViuTV宣布MIRROR5月於九龍灣展貿Star Hall舉行第2次演唱會 ONE & ALL LIVE 2021,一共6場。由於門票難求,有「黃牛黨」開價6位數字出售原價$780嘅尾場門票。6月底,由Edan及Anson Lo主演劇集《大叔的愛》創下Viu自家劇收視紀錄。

廣告代言都係人氣指標。有統計顯示,今年頭8個月,MIRROR包辦全港7成廣告代言。人氣高企嘅成員差唔多每星期都有品牌活動,而且所到之處定必萬人空巷,7月MIRROR與ERROR全體成員出席屯門商場活動,估計過萬歌迷聚集商場及附近一帶霸位,有人4日前已經到場。管理MIRROR嘅電訊盈科喺年中業績報告指,由於MIRROR帶動廣告收入增加,令ViuTV上半年的虧損由去年同期約 9500 萬元大幅收窄至 4400 萬元;至於上半年 ViuTV 的相關業務收入達 2.56 億元,比去年上半年增加近一倍。估計半年間MIRROR帶來嘅收入接近一億!

MIRROR 爆紅,fans應記一功。除咗乖乖「課金」買偶像代言產品之外,成員生日前後佢地都會買下廣告位賀壽,好似4月底姜濤生日前,「姜糖」喺姜B屋企所在嘅銅鑼灣買下大量廣告位,令該區變成「姜濤灣」;Anson Lo嘅神徒就喺天星碼頭巨型廣告牌刊登賀壽廣告,更成為打卡熱點,令「教主」人氣急升,甚至IG fans人數追過人氣隊友姜濤。正因為Fans追星瘋狂,有網友於Facebook成立「我老婆嫁左比Mirror導致婚姻破裂關注組」,引發唔少「鏡粉」身邊人嘅共鳴,2日內吸納16萬成員,至現時已有超過34萬人加入,可算係以另一角度展現MIRROR人氣。

MIRROR ERROR最新IG人氣排位 盧瀚霆力壓姜濤稱王 追蹤人數2個月升80%
MIRROR ERROR最新IG人氣排位 盧瀚霆力壓姜濤稱王 追蹤人數2個月升80%

「鏡仔」亦開始受外地傳媒關注,早前韓國MAMA頒獎禮選出Anson Lo(盧瀚霆)為最佳亞洲新人獎(華語地區),隊友姜濤亦都獲荷里活媒體Variety選為「2021國際人氣急升藝人」(International Breakout Stars of 2021),唔止係唯一一位入選香港藝人,更加係名單上唯一嘅華語藝人,又以「香港近20年來最耀眼新星」形容姜B。

呢股MIRROR熱潮仲未有停低嘅勢頭︰今年叱咤「我最喜愛的男歌手」5強之中,有4位都係MIRROR成員;「我最喜愛的歌曲」5首候選歌之中亦有3首來自MIRROR成員;姜濤、Edan、Anson Lo、Jer同Anson Kong參演嘅電影明年會陸續上映。仲未計傳聞中下年7月舉行嘅10場紅館個唱!2022年,繼續係鏡仔嘅世界。

按此下載全新Yahoo APP,睇盡最新娛樂新聞、樂壇消息、名人熱話、熱門電影、Netflix劇評,新人更可即時換領限量新人禮,立即下載!