大茶飯│小輪搞醫美早有伏線（青冰）

今星期港股係威係勢，無論是傳統股及科技股都強彈，周二指數微跌，但四叔全系股票都逆市大升，恒地（012）升2%，但旗下的冷門股就勁喇，美麗華（071）升6%，恒基發展（097）升7%，香港小輪（050）勁升18%，通常冷門股勁升，原因不外幾個，私有化憧憬，或者是年老掌舵人去世，引來賣盤或重組憧憬，簡而言之就是大動作，由冷變熱，不過周三收市後，香港小輪就有通告，解開謎底，表示位於青山灣段的地產項目會在今年入伙，另外還會進軍醫美行業。

下載Yahoo財經APP

美股、外匯、加密貨幣免費即時報價，自選投資組合獲取相關新聞提示。

醫思前執董早入局

香港小輪要搞醫美，其實都有伏線，公司在去年8月公佈中期業績後，宣佈委任李嘉豪為集團總經理，這位李生早前在醫思醫療（2138）做了七年營運總監，亦做了五年執行董事，醫美經驗豐富，不過由於香港小輪係一隻冷門股，所以大家都無留意這新聞，但醫思醫療和香港小輪的業務，可謂風馬牛不相及，而且一上任就是集團總經理，可見係一早就有心發展醫美。

按8月的中期業績披露，香港小輪有22億元投資物業，10億元現金，接近零負債，近期急升後市賬率仍只有0.38倍，可謂資產豐厚，但地產及小輪業務各貢獻七千幾萬收入，屬聊勝於無。

現時在港上市的醫美股，完美醫療（1830）及醫思醫療的市值分別有63億及113億元，全年度收入分別有11億及20億元，香港小輪拍埋去無論是市值及收入都差一截，若想發展醫美，相信最快的方法就是作併購，打好基礎才可做大做強。雖則香港小輪系出名門，有恒地照住，但併購以上兩間就暫時沒可能了，最大的機會還是收購一些未上市而有規模的醫美公司。情況就如同系的恒基發展，2014年先向母公司恒地收購千色店，再在2018年向日資收購UNY的香港業務，幾年間就由「殼股」變成以零售百貨為主業，這應是香港小輪的路線圖，不過睇返恒基發展多年來的走勢，雖然業務愈做愈大，但股價就乏善可陳，所以戰友們不應對香港小輪抱太大期望，不要以為回咗兩大棍就好抵買呀。

青冰

http://www.fb.com/chingbing888

本欄逢周五刊出