天生高大難瘦身 劉穎鏇斷食2個月 飲齋啡頂肚

無綫小花劉穎鏇首次有兩齣劇集同期出街，令她興奮又意外。她表示為了拍穿泳衣選美的戲份，強迫自己進行「186斷食法」2個月，即使餓到打鼓也僅以齋啡頂硬上，認真有毅力！

入行6年的劉穎鏇（Tiffany）主演的無綫劇《鐵拳英雄》及《青春不要臉》差不多時間播出，她坦言感到意外，因已有一段時間沒參演的劇集播出。談到《鐵》劇3年前拍攝，她表示當初誤會演打女，沒料最終獲安排演柔弱女子。

狂摑陳山聰

劇中陳山聰演她表哥，她笑言當時與對方首次合作，開工數日便要拍攝掌摑山聰的戲份，令她相當害怕：「之前完全唔識佢，勁驚整到佢，點知佢叫我真打，仲教我點樣打好睇啲，結果我豁出去，都拍咗幾次，當明白點打之後就好順利。（打咗好多巴？）10巴以下，不過佢冇被我打到面腫，只係少少紅。」又稱拍《鐵》劇獻出不少第一次：「有場戲講我被人強姦，拍嗰時大家都好專業，有身體碰撞，但都係整瘀少少，未至於好傷。」

至於另一套孭飛的《青》劇，Tiffany與丁子朗、余德丞、伍樂怡等合作，她笑言拍攝過程融洽：「劇入面我係滾軸溜冰高手，其實我一啲都唔識，所以跟教練學咗2個月。」又指有一場穿泳衣選美的戲份，特別花2個月時間減磅：「因為本身骨架好橫又高，所以用咗『186斷食』，全日只係6個鐘頭食嘢，維持咗2、3個月，記得當時就算早起身餓到個肚打鼓，都只會飲齋啡頂住，其實好唔健康，所以之後改咗做Gym，等線條靚啲。」