【女友大十年】《愛回家》朱凌凌 吳偉豪17歲考藝訓班 屋企四兄弟勁高質

喺《愛回家之開心速遞》飾演朱凌凌嘅TVB小鮮肉吳偉豪(Ricco)，早前喺IG出post大晒酒店staycation相，點知有眼利網友發現同行嘅原來仲有大Ricco10年嘅金毛索女Charlotte。傳媒向吳偉豪求證，佢都大方承認戀情。

現年22歲嘅吳偉豪，出身小康之家，父母都係公務員，由細到大都係讀國際學校。背景咁「鬼」，但係熱愛周星馳同梁朝偉，加上鍾意演戲，Ricco冇出國讀戲劇，反而係17歲就去投考無線藝員訓練班。喺訪問入面，吳偉豪話因為清楚自己目標，所以寧願放棄學業，反正讀完大學都係會行同一條路，早啲開始仲好。

通常藝訓班畢業都要做吓路人甲乙丙，但係吳偉豪畢業無耐就有份參與《愛回家之八時入席》，飾演鍾景輝個孫禾仔，有名有姓有戲份，難怪被人傳係咪有人照住。接住《八時入席》嘅《開心速遞》都預咗吳偉豪，角色朱凌凌同金城安（周嘉洛飾）戲中做大學同學，備受觀眾歡迎，甚至認為佢地係一對！

靚仔又後生，吳偉豪仲要有爆肌身型，難怪《開心速遞》要安排除衫戲俾佢搶收視。原來吳偉豪屋企一門四傑，大哥係消防處消防隊長，二哥係新晉飛機師，細佬更加係模特兒，基因贏晒！