「好驚見唔到你哋」 蔡一傑開騷前失聲 急入院打針

蔡一傑全晚演出表現穩定。
蔡一傑全晚演出表現穩定。

草蜢演唱會前晚尾場,但原來臨開騷前,蔡一傑曾失聲,開騷前2小時仍在醫院打針「救聲」,幸最終冇事,他在台上談及此事時忍不住爆喊!而蔡一智表示於MIRROR演唱會綵排受傷的舞者羅德智原本有份演出,但因未能完全復原,故只幫手排舞。

草蜢一連4場紅館演唱會前晚順利完成,前來捧場包括伍詠薇、林海峰、林德信、關心妍、鮑起靜等。Encore環節時,蔡一智笑言是「Omakase式Encore」,已選了一堆歌曲送給歌迷。整晚演唱穩定的傑仔自爆開騷前失聲,他哽咽說:「今晚6點幾其實我係失咗聲,入咗醫院打針,我真係好驚,好驚見唔到你哋,不過依家已經開番聲,可以見番你哋。」當草蜢獻唱最後一首歌《我們》,傑仔邊唱邊喊,相當激動,完騷到後台時仍淚如泉湧:「頭先醫院張單都未埋,護士就叫我趕返嚟紅館!」

羅德智未完全康復

草蜢受訪時表示4場演唱會未夠喉,希望明年能開part two。提到MIRROR演唱會發生意外後,他們是首個演唱會有升降台裝置,問到是否花了不少時間綵排確保演唱會安全?阿智表示:「可以咁講,都花多咗5、6日時間綵排,所以成個騷都好順利。」對於請來於MIRROR紅館演唱會綵排受傷的舞者羅德智(Zisac)排舞,是否有意讓他克服創傷?阿智說:「唔係,一早就搵咗佢,好彩佢復原得幾好。原本佢會幫我哋跳,但係暫時就未去番以前咁,所以只係幫我哋排一部分舞。佢創傷克服得OK,希望佢快啲復原,多啲合作。」

而傑仔表示:「呢幾日都冇事,把聲仲非常靚,今朝起身以為仲未開到聲,綵排到5點發覺唔對路,然後6點去醫院打針,姑娘仲叫我加油,慢慢先返嚟畀錢。自己好驚失場唱唔到,所以好大壓力,打完針返嚟一直冇講嘢同飲暖水,去到8點先慢慢開到聲。」

蔡一傑哽咽表示開騷前失聲,很擔心失場。
蔡一傑哽咽表示開騷前失聲,很擔心失場。
草蜢希望明年再開紅館騷見歌迷。
草蜢希望明年再開紅館騷見歌迷。