姚焯菲宣布暫別歌迷 將赴新西蘭留學

姚焯菲

歌手姚焯菲(Chantel)由除夕到元旦接連應邀出席商場活動搵真銀,踏入2023年錢包即刻腫脹,年僅16歲的她再次強調:「唔知自己有幾多錢,唔係我管理。」早前被指偕同家人到新西蘭「探路」,意欲出國留學,今日Chantel終承認會暫別歌迷:「計劃中,暫時未知幾時走,走前一定會話畀大家聽。我自己一個去新西蘭,中間會返嚟嘅。(諗住讀邊科?)應該係Business或者時裝。」

身為Chantel好姊妹兼同屬組合After Class成員的鍾柔美,今日亦同場,當聞得Chantel的決定大感不捨:「我本身都未去過新西蘭,有時間放假會飛過去探妳,冇咗你好似爭咗啲嘢咁。」Yumi本身亦正準備中五校內試,故昨晚未有外出倒數:「留咗喺屋企同家人一齊,返去就考試,所以要溫書,今、明兩年成績好緊要,想準備好啲。(你又有冇諗過出國讀書?)未諗,應該要諗,我唔捨得,想留低。(有信心考到大學?)信心要有,靠自己努力。(有乜新年願望?)好簡單,最緊要身體健康同開心,希望出多啲新歌、出活動見多啲大家,及學業為重。」