姜麗文曾窮到買唔起士多啤梨 眼見爸爸秦沛為養家高溫拍戲：憑咩洗佢儲落嘅錢？

秦沛女兒姜麗文（Lesley）並無因「星二代」身份而得到特別厚待，反而選擇默默耕耘，終於喺近年憑《愛．回家之開心速遞》外傭Lisa一角，及台慶劇《星空下的仁醫》病童母親一角，演技大獲好評。原來姜麗文勤力工作，目標清晰，係自細受爸爸影響？

姜麗文喺27歲分手後半年患上情緒病，佢曾經喺接受訪問時講到情緒病困擾一直都存在，但唯一生存方法就係要學習共存。姜麗文近日接受商台《1圈圈 星光背後》節目專訪，重提情緒病一事，指感謝過往經歷令佢更懂得愛自己；姜麗文仲大談與爸爸嘅父女情，坦言親生媽媽喺佢1歲前就走咗，爸爸傾家蕩產爭取佢同哥哥姜文杰（Benji）撫養權，眼見爸爸為咗養家，即使拎咗金像獎最佳男配角，仍然任何工作都接；曾有一次仲見證爸爸喺40幾度高溫下頂著妝髮拍攝：「他真的很偉大、無得頂！」。佢又提到，即使經濟環境唔係特別好，爸爸都會將最好嘅嘢畀晒佢哋，就好似安排佢哋入讀加拿大一間好學校、學騎馬、滑雪、跳舞等等，又成日畫畫、寫情書、送禮物畀佢同哥哥，令佢唔會有分隔兩地同爸爸唔係身邊嘅感覺。

曾經受訪指自己3歲已想做歌手嘅姜麗文，曾與哥哥組成「Benji & Lesley」自資20萬元積蓄推出EP，第1年新人時期只賺了萬幾蚊，姜麗文回憶當時生活拮据，曾經試過窮到行超市時想食士多啤梨，但見到要5、60元一盒，買唔起而喺超市喊咗出嚟，但佢都未曾向爸爸求助：「慶幸阿爸不知這件事，但那時真的很辛苦！我和阿哥都無要求過爸爸幫忙，因為阿爸好勤力好辛苦賺錢，特別現在他76歲，我們憑甚麼花他這麼多年來儲下的錢？他該用這些錢跟媽咪（繼母）享受二人世界，自己生存到就沒問題。」

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！