娛圈單打:愛是全奉獻 講心又講樓

城城金曲都有得唱:「LOVE,愛是全奉獻!」不過唱歌就話易啫,真正做到「全奉獻」又有幾人?呢嗱,72歲嘅李龍基就做到喇!眾所周知,佢同細36歲女友Chris Wong打得火熱,更有意於年內拉埋天窗。為表誠意,佢日前將7個物業悉數轉到女友名下,連親生仔女都冇份㗎,仲唔係愛是全奉獻!

本欄早前寫過李龍基「老年得女」,如沐春風,佢仲自爆雙方性生活協調,打算盡快見家長娶女友入門。為保障女友將來生活,他近日豪氣地將7個物業轉名給未婚妻,說得出做得到。嘩,大拿拿7個物業,價值不菲,可見李龍基付出百分百真心,呢段爺孫戀係真愛無誤!

Chris亦非常叻女,除了本身有藝術底子、畫功高超外,更是孜孜不倦,不斷進修。她最近報讀了北京航空航天大學EMBA課程,學習營銷管理,在社交網上載筆記和上課情況,揚言:「沒有不付出的名成利就!」更大騷過去考獲的多張證書,證明多才多藝。而李龍基本身是遙控飛機發燒友,女友則懂得揸小型飛機,咁鬼合拍,難怪感情發展一日千里。

當然啦,不管你儂我儂,多麼的郎情妾意,梗有人睇唔過眼。正如子華神話齋:「睇人仆街最開心!」不少網民對呢段爺孫戀意見多多,質疑兩人年紀相距太大,擔心有人「起飛腳」,男方人財兩失。

唉,世事無常,人情多變,邊擔心得咁多。是否真情實意,只有主角才有話語權,李龍基傾盡全力愛護女友,反映Chris帶給他的快樂遠超物質價值。網民與其不安好心,等睇好戲,不如相信真愛,送上祝福啦!