孫仔車禍身亡 成奎安靠「大傻」成港產片惡人代表 曾參選區議會

星期日早上西貢科大迴旋處發生嚴重車禍，一輛私家車失事剷上花槽，25歲姓成男司機傷重死亡。經傳媒查證，死者係已故藝人成奎安嘅男孫。

人稱「大傻」嘅成奎安係西貢土生土長原居民，生前熱愛賽車，離世12年後孫仔因車禍喺西貢英年早逝，令不少人感到唏噓。

成奎安可以話係八九十年代港產片惡人代表，憑《監獄風雲》「大傻」一角而廣為人認識。成名前嘅大傻本來係幕後人員，做過臨記、攝影助手、龍虎武師等，80年代中期被電影人李修賢相中參與幕前演出。《監》一片當年大熱，成奎安與同片嘅何家駒、黃光亮及另一位有江湖背景嘅李兆基，被稱為「影壇4大惡人」。

成名後成奎安片約不斷，高峰期一年參演近20套戲，亦曾經拍過TVB劇《900重案追凶》、《創世紀II之天地有情》、《金裝四大才子》等。

「惡形惡相」以外，大傻最為人記得係同西貢嘅淵源。佢係西貢南圍村原居民，曾經係該村村代表。2003年更加參選區議會，同建制派代表對壘，但不敵落敗。成奎安亦係賽車愛好者，參加過澳門大賽車同港京拉力賽。

2004年成奎安確診患上鼻咽癌，接受化療同電療後痊癒。不過根據當時報導，大傻自言係家中收入支柱，治病花咗大部份積蓄。大傻康復後忙於北上登台拍戲，疏於打理健康，結果再被驗出患上肝癌。2009年8月底，成奎安於香港浸會醫院病逝，終年54歲。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！