宣傳被玩謝 周嘉洛口快劇透 龔嘉欣爆波傷腳 江嘉敏成腦粗口

藝人龔嘉欣與江嘉敏昨日出席宣傳活動，玩遊戲時齊齊被嚇破膽，當中龔嘉欣不慎整傷腳，江嘉敏更形容想爆粗兼眼泛淚光！同場的周嘉洛大方承認為緋聞女友陳瀅獻出「第一次」。

陳豪、周嘉洛、龔嘉欣與江嘉敏等昨日宣傳劇集《新四十二章》，玩爆波遊戲時，龔嘉欣被嚇到花容失色，扁嘴向陳豪「投訴」，玉腿更於氣球爆破時擦傷。而江嘉敏看見氣球充氣已不斷尖叫，最終驚到跪地指「只有20字粗口」，更眼泛淚光。

劇集尚餘4集，陸續有角色離世，周嘉洛劇透說：「我嘅下場好平淡。（唔使死？）唔使。（最後同江嘉敏一齊？）Happy Ending嘅。」談到與陳瀅去日本旅行，他大方說：「我去咗4日，同行有成10個人，包括JW（王灝兒）同羅天宇等，我係同羅天宇及圈外好友一間房。」又自爆第一次去旅行，對行程大感滿意：「日日玩到唔願瞓，原來同朋友旅行係好開心，玩咗好多機動遊戲。（有艷遇？）日本咁多靚仔靚女，點會睇得我上眼？（JW去散心？）大家都係玩為主。（佢男友同行？）我唔見囉！」

打上癮恨開續集

對於劇集縮減了一集，身為「男一」的陳豪表示只想劇情更緊湊；龔嘉欣則透露大結局當晚會再安排宣傳，問是否有計劃開續集？她笑說：「我想開拍《殺手2》先。」又自爆：「同監製陳維冠合作咗咁多次，《殺手》同《新》劇我都好鍾意，當初佢開《七公主》我竟然冇份，咪去問佢囉！原來佢預咗我開《新》劇。（唔驚續集又要打到飛起？）豁出去喇！武術指導話我可以做替身喇！」

對於6月開拍的《企業強人》有陳豪及譚俊彥兩大視帝「加持」，龔嘉欣被睇好勢奪視后，她說：「係我嘅榮幸。（信心大咗？）一定會，兩個都合作咗好多次，都係好到不得了嘅拍檔，搵到佢哋事半功倍，我簡直有幸運之神眷顧。」