家務幫 App－ 隨時 Call 鐘點、湊 B、陪月，亦可自薦搵錢

妍嫣

小編細個的時候，放學就會去樓上的陳師奶屋企，同朋友仔一齊睇卡通片、食茶點，跟住阿媽放工先黎接我走。工人姐姐？邊有呢啲嘢架～我細個果時的鄰里關係雖然唔及得上六、七十年代，但都一定比而家好，可能因為當時經濟環境比較好啦。雖然而家的人平均教育水平同消費力都高左，但係都追唔上物價，有能力都會出去賺多個錢傍身，咁冇時間做家務點算呢？

k4
k4

搵人 PT 打掃屋企

最近有個手機 Apps 就非常切合到香港「忙碌都市人」的需要喇！呢隻可以幫你搵家務助理的 App －「家務幫」（Agent Bong）早幾個月前正式在各大平台登場，佢一方面可以幫到僱主搵幫手，同時又可以協助家務助理搵工，令社會資源可以更有效地分配。而小編最欣賞的地方就係平台上的家務助理都係本地人，溝通完全冇問題之餘，更無需特別搵地方俾佢留宿，對於面對嚴重「土地問題」的香港家庭絕對係個大好消息。

k1
k1

呢隻 App 算係比較易用，無論你想請人定搵工，在開始使用之前都要先登記賬戶。

k2
k2

如你想請幫手，按下「搜尋工作」就睇到成個列表，找尋啱你的助理。你仲可以利用「篩選」功能，選擇工作類別，例如家務助理、陪月、或托兒；而選擇「地區」則幫你搵到想在該區工作的助理。你亦可以自行刊登一份新工作，讓人申請，再根據申請人的經驗、評分及價錢作出決定。做完野，仲可以俾 Review，讓其他人參考。

k3
k3

亦可自薦搵錢

至於如果你想搵工當然都冇問題，你首先可以用隻 App 編輯個人檔案，填寫技能及強項供僱主參考，例如清潔、托兒服務或陪月服務等。當相應服務要求出現果陣，系統就會自動發出通知。家務助理亦可以主動在「搜尋工作」的列表中申請僱主上載的工作。

傳統家務助理中介服務收費昂貴而且質素未必有保證，「家務幫」呢個 App 就可以提高透明度，勞資雙方都有主動性，令配對成功機會更高！香港充斥住「忙碌的都市人」，家居服務市場絕對有一定發展空間，更何況印、菲兩國已在較早前宣佈將會逐步減少對外輸出傭工，直到 2017 年就會基本停止，呢個政策相信會對香港家庭帶來唔細既影響，「家務幫」呢個時候推出可算非常合時呢！


• 不想錯過新科技 ? 請 Follow unwire.hk FB 專頁 http://facebook.com/unwirehk/

The post 家務幫 App－ 隨時 Call 鐘點、湊 B、陪月，亦可自薦搵錢 appeared first on UNWIRE.HK 流動科技生活.