尋人記2｜險入歧途「杯麵男孩」30年後自食其力 網民大讚節目貼地又感動

由方東昇、黃曉瑩、李曉欣及黃靖婷主持嘅TVB資訊節目《尋人記II》，如第一季概念一樣，抱住唔放棄嘅心態繼續尋找八九十年代昔日新聞被訪者或故事人物，雖然節目只係播出三集，不過就已經引起迴響，成為網上熱話。噚晚（26日）第三集就係尋找30年前終日流連街頭，唔鍾意返屋企嘅「杯麵男孩」志文。

攝製隊透過搜尋新聞部資料庫、舊報紙、逐家逐戶公屋拜訪及訪問舊街坊等最原始方式尋人，結果成功落區得到街坊嘅資訊，順利搵到喺麵檔工作嘅志文。志文喺接受採訪時指自己當年唔鐘意返學，除咗流連遊樂場之外，佢試過扮病唔返學搞到俾老師上門搵佢。另外，志文亦表示喺托管中心嗰兩年係佢過得最開心嘅日子，除咗有人同佢慶祝生日之外，仲有飽飯食。

來自單親家庭嘅志文，喺節目中大爆唔鍾意返屋企嘅原因，佢就話爸爸可能因為同媽媽分開嘅關係成日飲醉酒，一飲醉酒就會鬧人，不過爸爸由細到大都冇打佢同哥哥，仲話如果爸爸冇飲醉酒嘅話係一個好人。被問到有冇埋怨爸爸時，志文就話爸爸喺年幾前因病去世，細個嘅時候有埋怨，去到長大出社會工作就冇。志文喺節目中講到自己唔鍾意讀書，一見到字就眼瞓，讀到中三就投身社會工作，而第一份工就係做廚師，原因係「有飽飯食」。而細個嘅經歷亦有影響佢日後嘅人生，細個冇物質，佢表示公司同事買電話佢買電話，之後越碌越大，導致欠卡數破產，直至被人上門追債，佢先醒覺要作出改變。

差啲誤入岐途嘅志文就話好彩有托管中心嘅黃sir，仲話如果冇黃sir嘅話，佢都學壞咗，所以佢形容黃sir係「半個爸爸」同「半個導師」。而失散接近三十年嘅佢哋，透過節目再次見面，志文除咗煮「謝師雙蛋麵」俾黃sir食之外，佢哋仲一齊睇昔日嘅片段，期間仲一度感觸，冇諗過志文冇變壞，感到好安慰。

網民們睇完節目後，紛紛留言大讚節目真摯、高質及貼地，例如「今集好貼地」、「呢一個先係真理先係現實，現實就係有絕望，今輯尋人記好貼地」、「好彩香港仲有咁真摯既節目，不偏不倚，令人感動同反省。」、「呢個尋人記節目好正，成個團隊冇得頂」、「好睇，感人，高質節目」、「一個十分高質量的節目,內容豐富,每位主角,每段事物……都會發人深省,向尋人記各位主持同幕後人員致敬」及「感謝尋人記團隊為香港觀眾帶來最真實最真摯的記錄片」等等。同時亦有唔少網民話今集好感動同睇到眼濕濕，例如「喊咗…其實好慘…佢都冇人理，冇人教，真係自生自滅，喺中心嗰兩年已經話係最開心」、「好鬼感動，眼濕濕」、「志文真係樂天知命 睇到哭X左」、「淚崩，好感人呀，咁多年後的重遇好難得」、「呢集睇到我眼濕濕，特別黃sir 的岀現，謝師麵真係好感動」、「好感動的一集。 志文本質應該是很好的，黃Sir 只係陪左兩年，足以令志文終生受用。 祝黃Sir 及志文健康平安」、「我男人老狗都忍唔住 特別係黃sir講一番話」及「好好睇，喊到痴晒線，好多謝方東㫒比我地咁好既節目 可以釋放情緒」等等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！