【睇片】屹立近半世紀 不敵快剪店 上海遠東理髮榮休

懷舊剪髮櫈、炭精風筒、正宗上海刀法，逐一被捲入時代巨輪。位於元朗的上海遠東理髮店創立 48 年，為全港首間女師傅主理的正宗上海理髮店。現年 60 多歲的老闆斯姐及鳳姐，從小已跟隨父親學藝，傳承上海恤髮藝術，最高峰每日有過百位顧客。不過，受快剪店及疫情夾擊，遠東客量大不如前，亦因無人入行難以聘請理髮師傅，決定營業至 5 月底正式「榮休」。

文字記者：盧珮瑤

攝影記者：HLKP

遠東現時由大家姐斯姐、胞妹鳳姐打理。在遠東結業最後幾天，熟客紛紛上門，以恤髮為名，探望兩姊妹為實，抓緊最後機會在「小上海」角落聚首。有光顧逾 40 年的客人剪髮後特意多待一會，輕嘆「第時唔知去邊度坐喇」。

爸爸為「星級髮型師」 邵逸夫是熟客

姊妹花能夠成為香港罕見的女師傅，全賴年輕時跟隨爸爸王兆鴻學藝。王師傅16歲在上海學剪髮，1951年遷至香港，在港島半山的高級理髮公司工作，後來自立門戶，於銅鑼灣、旺角開設理髮公司。王師傅屬當年炙手可熱的星級髮型師，邵逸夫、「美容教母」鄭明明亦是其熟客，「嚟得嘅都係有名堂，明星、騎師......爸爸會叫我哋開電視睇啲明星，話『爸爸恤㗎呢個頭！』」。

後來兩間理髮公司因六七暴動一掃而空，王師傅40歲那年於元朗福德街開設「孔雀髮廊」，繼而接手打理樓下的遠東，兩店後來合併搬至現時炮仗坊舖位，手起刀落便半世紀。

斯姐、鳳姐早於10多歲就成為爸爸的得力助手，「我哋係自己女，一放學返嚟就乜都要做，洗頭、遞嘢，咁上下就推你上去做師傅」。鳳姐指，爸爸性格急躁、教導嚴厲，兩姊妹對他心生敬畏，「家姐有時貪玩，放咗學走咗去飲茶無幫手，爸爸會走去捉佢返嚟，喺舖頭樓下一把『星』落去」。斯姐形容他是「緊張大師」，只因著重服務質素，「以前啲客要去廁所，佢要我即刻出嚟畀人去㗎！爸爸不嬲都教顧客永遠係對的、係第一，我哋將呢樣嘢都帶到嚟呢度，真誠對客」。

「揚州三把刀」剃鬚馳名 珍藏古董炭精風筒

上海理髮七十年代起盛行，分為男界和女界。鳳組憶述，當時女顧客喜愛不同時髦髮型，「以前啲人叫恤髮即係 set 頭，八十年代多數會整大頭裝、筷子姊妹花頭、梳簪、『豬腸頭』，九十年代就興沙宣頭」；男界服務除了洗剪吹亦暗藏王牌，「啲人嚟得都係貪剃鬚，連耳仔、眉毛邊都會剃，剃完好似做咗facial（美容）咁」。師傅剃鬚前，會以梘泡塗抹在鬚根位置，再加以熱毛巾舒緩毛孔，令鬚根軟化，效果更貼服順滑。

遠東以「揚州三把刀」的剃刀刀法馳名，店內使用德國製孖人牌剃刀。師傅「動刀」前，先用剪髮椅旁邊的皮帶磨利刀鋒，鳳姐說：「如果磨唔切就轉用刀片，不過刀片成本貴，爸爸唔捨得用」。店內有出品逾50年的「飛機仔」炭精風筒，特點是出風口細、風力集中，不需定形噴霧或髮蠟就有燙髮之效，「呢隻擺埋少少都會電燶人啲頭髮，要控制得好好」。

快剪店及疫情夾擊 客量大幅減少

時代對工藝總是毫不留情。鳳姐指遠東在全盛時期日接過百顧客，「以前我哋兩姊妹一日洗 60 個頭，周地都係頭髮，啲捲髮筒直頭搵唔返」；現時，兩姊妹休閒坐在店中與熟客笑談風生，送客時說「有緣再見喇，後會有期」。鳳姐難免不捨，「我呢幾晚都瞓唔著，倒數住仲有幾多日」；斯姐卻看得開，「都滿足喇，『夠皮』喇」。

斯姐續指，遠東以長者客為主，但不少人未有接種疫苗不能進店，亦難以行長樓梯上樓剪髮，加上快剪店盛行，令客量及師傅數量均大幅減少，故決定本月底正式「榮休」。

「我哋自己都知係夕陽行業，以前爸爸日日唸書咁，『執一間，少一間；死一個，少一個』，師傅、客都一個一個走（離世），其實好自然啫，好似生老病死咁，自己都會覺得唔使咁執著」。放下剪刀，未來何去何從？「我成世都無做過其他嘢，要搵下自己鍾意做咩，最緊要係留返啲時間畀自己」。