張家朗奧運奪金 林作秒速抽水惹網民不滿：請你尊重一下香港運動員

有「193劍神」之稱嘅港隊劍擊代表張家朗，噚晚以15:11擊敗意大利選手加羅佐，歷史性贏得奧運男子花劍金牌，同時為香港帶來第二面奧運金牌，全香港人為佢感到高興而歡呼！唔少藝人都有收睇奧運直播，見證張家朗奪金一刻，之後更喺社交網站出PO慶祝，而一向言論出位嘅林作亦即時出PO「抽水」。

林作與鍾培生嘅百萬擂台戰，較早前已經落實9月中舉行，二人積極備戰密密操練，呢場花生指數爆晒燈嘅賽事都未打，林作已經蠢蠢欲動打第二場比賽。林作喺社交網站出PO宣布喺與鍾培生嘅拳賽後轉學劍擊半年，將於下年3月迎戰張家朗，仲話到時會俾10萬出場費俾張家朗，等張家朗凱旋回港後搵佢傾傾。

此PO一出，唔少網民紛紛都留言鬧爆佢抽水同唔尊重運動員，例如：「尊重下人啦 好多嘢都可以講笑攞彩，但呢樣嘢真係一啲都唔好笑 對一個運動員來講這樣的一個玩笑並不可笑」、「唔好搞咁多啦 認真做多咗 人地係香港之光」、「無喇喇 抽人水做乜姐 行X開喇 攞人哋榮耀講笑」、「真正運動員由細到大，下咗幾多年苦功，你今次抽水抽得好low囉」、「你咁樣抽水有啲難睇....你應該係人哋挑你先出好出嚟」、「請你尊重一下香港運動員」、「好心你唔好咁失禮啦！除咗抽水你仲識咩啊？」及「呢個時候抽水唔係明智嘅選擇⋯⋯」等等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！