張家輝開金口掀高潮 張學友跪拜胡楓 明年贊助開騷

歌神張學友昨日擔任契爺胡楓演唱會嘉賓，即場跪拜對方「賀壽」，搞到胡楓感動得淚流滿面！他表示明年會贊助契爺繼續開騷，期間與「細佬」張家輝合唱，炒熱全場氣氛！

胡楓（修修）早前確診新冠肺炎，故將90歲演唱會延至昨午舉行。大批圈中好友許冠文、余安安及滕麗名等捧場，契仔張學友、張家輝及草蜢等做特別嘉賓，星光熠熠。

家輝自認小鮮肉

修修由一班女舞蹈員陪同出場，穿粉紅西裝配閃石眼鏡的他精神飽滿，以《紅日》及《舊歡如夢》等串燒歌揭開序幕，台下反應熱烈。張家輝隨後登場獻唱《分分鐘需要你》，他向修修笑言：「你要我唱首情歌，當我係你契仔定你條仔先？你咁嘅年紀，我塗起口紅都係小鮮肉！你拍咗386部戲，仲拍唔拍先？仲拍就要幫你搵個拍檔，就係Lady羅蘭！」羅蘭表示：「你做導演，從來冇搵我同修修，係咪下部搵我哋先？全場聽實喇！」家輝即表示如開戲必定找他們。

演唱會尾段，修修獻唱《愛是永恒》，張學友以壓軸嘉賓身份升上舞台，修修感動得淚流滿面！學友向契爺跪拜兼攬錫，他笑言：「我好耐冇跪過人，除咗老婆外，依家向你祝壽，祝你福如東海、壽比南山。」修修自爆：「86歲嗰年我開演唱會，學友同時間喺新加坡開騷，佢出動人造衞星直播同我合唱，我話使幾十萬做乜吖！今次佢主動傳短訊問預唔預佢？梗係預啦！」學友說：「出年你再開演唱會，贊助商會增加到30幾個，我都夾一份！」隨後家輝再度登場，與學友及修修合唱《情已逝》，全場氣氛高漲。