張敬軒3月倫敦開2場演唱會 1/18公開售票 殿堂場地第4位香港歌手開唱

因為感染新冠而煞停跨年演唱會嘅張敬軒，早前已經宣布3月會喺英國倫敦殿堂級表演場地 Royal Albert Hall 舉行演唱會。英國售票網已經有呢兩場名為 The Prime Classics演唱會嘅詳情。日期訂於3月16及17日舉行。

據知，演唱會將會為當地指定電訊商用戶提供優先訂飛，並於下周一（16日）開售。而正式公開售票將於下周三（18日）早上10點開始，不過大會暫時未公布票價。

軒公舉行演唱會嘅Royal Albert Hall係當地著名表演場地 ，已經落成超過150年，天后級嘅Lady Gaga同Adele都喺度開過show。香港歌手方面，早於1979年「歌聖」羅文成為首位喺嗰度演唱嘅香港歌手，之後去到2010年及2011年陳奕迅同容祖兒亦分別喺Royal Albert Hall舉行個唱。Royal Albert Hall有5千幾個座位，相信觀眾搶飛熱烈情況同香港不遑多讓。

近年唔少香港人移居英國，加上各項防疫限制解除，唔少香港歌手同band都已經計劃到英國開show。樂隊ToNick今個月尾已經率先喺英國Birmingham開唱，之後仲會去埋曼徹斯特同倫敦。而3月就有RubberBand去歐洲巡演，同樣會喺曼徹斯特同倫敦開show。早前到台灣舉行音樂會嘅黃耀明，亦宣布5月會去英國等多個歐洲國家演出。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！