雅虎香港新聞 影響幾代導演 法國電影大師尚盧高達安樂死離世享年91歲
英國皇室痛失母儀天下嘅女王伊利沙白二世，電影界呢期同樣痛失巨人。60年代法國電影新浪潮領軍人物之一嘅名導演尚盧高達，於瑞士逝世，終年91歲。據BBC報導，高達係以安樂死嘅方式告別人生。
尚盧高達1930年喺法國巴黎出生，家境富裕，1949年入讀巴黎大學主修人類學，課餘時間流連小型戲院，並涉足文化界，同相識嘅杜魯福、伊力盧馬、希維特等同樣影響後世嘅電影巨匠，創立電影刊物。
高達後來做過建築工人，將搵到嘅錢用來拍電影短片，1960年代開始執導長片，1960年嘅首套長片《斷了氣》空前成功，奪得柏林影展最佳導演銀熊獎，成為當代經典之一。同年佢同女演員Anna Karina結婚，並拍攝以阿爾及利亞戰爭為背景嘅電影《小兵》（Le Petit Soldat），由於題材敏感而被當局禁映3年。高達其他經典作有《狂人皮埃洛》、《女人就是女人》等，
到70年代，高達受革命思潮吸引，拍片以「工人階級」角度出發，反而人氣走下坡。到千禧年後，唔少人睇返高達舊片覺得正，令佢老人家登上殿堂，高達嘅作品水準亦有所提升。2018年參加康城影展之作《影像之書》，係高達嘅遺作。高達打破唔少電影常規，係強調導演要將自我風格放入作品嘅「作者論」倡導者。
高達喺唔少文青心目中係法國電影標誌人物之一，但佢多年來並冇得過奧斯卡評審垂青，只係2010年大會頒過終身成就獎。高達當時並無到美國領獎，仲回應話「佢地想點就點啦。我想知評審睇過我幾多套戲？睇邊幾套？明唔明？」，寸得佢！不過，你有料，咪寸得起囉。
更多電影文章
電影LOL︳今期睇咩戲 飯戲攻心／打死不離喇星夢／秘密任務2：International／老縫正傳
電影LOL︳女王效應 Netflix劇《王冠》英國播放數升8倍
電影LOL︳受性侵困擾變肥佬 班頓費沙回勇之作《鯨》首映全場起立6分鐘致敬
電影LOL︳南北韓軍人「非官方協商」？新片6/45好笑程度拍住《炸雞特攻隊》
電影LOL︳網友炒GAMESTOP打大鱷拍成電影 下個月開鏡 最強卡士係個導演！
電影LOL︳《爸爸可否不要老》導演再拍安東尼鶴健士 新片The Son再刻劃家庭事
按此下載 全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！
