必食浪漫聖誕大餐!銅鑼灣米芝蓮名廚自家新開法國Fine Dining餐廳!精緻菜式+歐式裝修CP值極高!

又到聖誕~諗住同另一半去食下聖誕大餐,又諗唔到食邊間好?今日小編就推介一間環境同食物質素都非常之高分嘅法國Fine Dining餐廳 – 「Shun」,而餐廳就係用主廚嘅英文名命名。主廚Shun曾經喺米芝蓮一星法國餐廳Petrus任職副主廚多年,有非常豐富烹調高級法國菜式嘅經驗。「Shun」同其他其他法國餐廳唔同嘅係,菜式會重新構思同加入適合本地人嘅口味,配搭會比較有創意同獨特,每一道菜由擺盤到味道都體驗到廚師嘅心思。

#餐前麵包

由餐廳自家嘅麵包師傅每日新鮮製造,唔係出面嘅現成貨。搭配麵包食嘅牛油都有3款選擇,除咗一般牛油之外,仲有紫菜味同煙燻辣味,小編大推紫菜味牛油,十分香濃,估唔到紫菜原來同牛油係咁夾㗎!

#「法式鮮蠔濃湯」

賣相好似《愛麗絲夢幻仙境》入面嘅畫面咁夢幻,第一眼以為係甜品,但原來呢個係「法式鮮蠔濃湯」,由3層配料層層疊而成,入面加入薯蓉、蠔湯等,最驚喜係竟然有原隻鮮蠔喺裡面,雙重鮮味喺口腔爆發~

#「新西蘭蟶子配三文魚子、烏魚子、萵苣」

我哋平時食蟶子通常都會配豉椒或者蒜蓉,無諗過以日式做法又幾夾喎!三文魚子嘅咸香令蟶子嘅鮮甜味更加昇華,而廚師亦都好細心咁處理蟶子,所以食落肉質非常爽口,一啲都唔韌!

#「日本馬頭魚配法國青口、蜆肉、寶塔花菜蓉、紅花汁」

鍾意食魚嘅朋友見到呢碟菜式應該好開心,因為啖啖肉好滿足~馬頭魚肉質嫩滑,日本人則稱之為「甘鯛」,並將它奉為高檔美味。經過油炸烹煮後,做到外脆內軟嘅效果,魚皮炸得非常鬆脆。搭配旁邊嘅寶塔花菜蓉同紅花汁一齊食,可以中和油膩感,令整體味道更佳。

#「乾式熟成美國和牛西冷扒」

美國和牛會先以乾式熟成方式處理,等幾個星期後再拎出嚟烹調,所以食落去牛味較香濃,而且做到外層香脆嘅效果,食落有啲似炭燒牛扒嘅感覺,同一般牛扒煎出嚟嘅口感分別大。

另外再搭配鵝肝、蘆荀、蘑菇蓉、薯蓉、黑松露菌汁。

#香脆蘋果批配雲呢拿意大利雪糕

有啲人可能會覺得一般嘅蘋果批玉桂味太濃郁,或者有啲會夾住吉士醬太甜,而呢個絕對會顛覆大家對蘋果批嘅印象。第一次見咁薄嘅蘋果批~酥皮又薄又脆,蘋果酸酸甜甜,清新又純綷嘅蘋果香味令人一啖接一啖停唔到手,食晒成個都唔會滯!

Shun
地址:銅鑼灣銅鑼灣道25號地下
電話:28852331 / 64636693
訂座:linktr.ee/shun.hkg